सुर्खेत। वीरेन्द्रनगर नगरपालिका–५ का वडाध्यक्ष लोकबहादुर शाहीको निधन भएको छ। क्यान्सर र निमोनियाबाट पीडित शाहीको मंगलबार बिहान घर फर्किँदै गर्दा बाटोमै मृत्यु भएको हो।
काठमाडौँस्थित वीर अस्पतालमा उपचाररत शाहीलाई सुधार नदेखिएपछि घर ल्याउने निर्णय गरिएको थियो। तर, एम्बुलेन्समा सुर्खेत फर्किने क्रममा भेरीगंगा नगरपालिका–७ स्थित हर्रे आइपुग्दा उनको निधन भएको कार्यवाहक वडाध्यक्ष वासु आचार्यले जानकारी दिए।
६० वर्षीय शाही पछिल्लो एक वर्षदेखि फोक्सोको क्यान्सरबाट पीडित थिए। त्यसक्रममा उनलाई निमोनियाले समेत आक्रमण गरेको थियो। वीर अस्पतालको आइसियुमा राखेर उपचार गर्दा पनि अवस्था नाजुक हुँदै गएपछि अन्तिम इच्छा अनुसार परिवारले घर फर्काउने निर्णय लिएको थियो।
लोकबहादुर शाही २०७९ सालको स्थानीय तह निर्वाचनमा नेकपा एमालेबाट निर्वाचित भई वडा नं. ५ को वडाध्यक्ष बनेका थिए। उनी झण्डै १० महिनादेखि उपचाररत थिए।
शाहीको निधनले स्थानीय तह र वडावासीबीच शोकको वातावरण सिर्जना भएको छ। पार्टी कार्यकर्ता, जनप्रतिनिधि र स्थानियबासीले उनको योगदानलाई सम्झँदै श्रद्धाञ्जली अर्पण गरेका छन्।
