सुनसरी। कोशी प्रदेशका मुख्यमन्त्री हिक्मतकुमार कार्कीले जिल्लामा पूर्वाधार निर्माणका कामलाई व्यवस्थित र सहज ढङ्गले सञ्चालन गर्नका लागि सुनसरीमा पुर्वाधार कार्यालय शुभारम्भ गरिएको बताउनुभएको छ ।
सुनसरी सदरमुकाम इनरुवा–४ स्थित बस चौकपार्कमा पूर्वाधार कार्यालयको उदघाटन गर्नुहुँदै उहाँले नागरिकको घर नजिकको प्रदेश सरकारको कामलाई प्रत्यक्ष रूपमा जनतालाई महसुस गराउने उद्देश्यसहित कार्यालयको स्थापना गरिएको उल्लेख गर्नुभयो ।
विकासको कामलाई तत्कालै अगाडि बढाउन र स्थानीयको प्राथमिकताको आवश्यकतालाई मध्यनजर गर्दै सरकारको योजनाअनुसार कार्यालय स्थापना गरिएको उहाँले उल्लेख गर्नुभयो ।
उहाँले सुनसरीमा प्रदेशकै ठूलो आयोजना कोशी रिफ्रेसमेन्ट सेन्टर यसै वर्षबाट सञ्चालनमा आउने, दुई वर्षभित्रमा अरवौका संरचना निर्माण गर्ने गरी प्रक्रिया अगाडि बढाएको जानकारी दिनुभयो । त्यसैगरी रामधुनी र कोशी टप्पुलाई पर्यटकीय आर्कषक गन्तव्यका रूपमा विकास गर्न लागिपरेको उहाँको भनाइ छ ।
दुहवी–इनरुवा सडकको यसै वर्षबाट ठेक्का लगाएर निर्माण काम अगाडि बढाउने र कौवाखोच सडक निर्माणलाई तीव्रता दिएको बताउनुभयो ।
कार्यक्रममा कोसी प्रदेशका आन्तरिक मामिला तथा कानुन मन्त्री रेवतीरमण भण्डारी, पर्यटन, वन तथा वतावरण मन्त्री सदानन्द मण्डल, प्रदेशसभा सदस्य इसराईल मंसुरी, रामप्रसाद मेहता, जिल्ला समन्वय समिति सुनसरीका प्रमुख राजन मेहता, सुनसरीका प्रमुख जिल्ला अधिकारी धर्मेन्द्रकुमार मिश्र, इनरुवा नगरपालिकाका प्रमुख केदार भण्डारी, हरिनगर गाउँपालिकाका प्रमुख गफार अंसारी लगायतको उपस्थिति थियो । रासस
