काठमाडौं । रोल्पाको थवाङ गाउँपालिकाका प्रमुख प्रशासकीय अधिकृतसहित सात जना कर्मचारी तीन दिनपछि पालिकाको सम्पर्कमा आएका छन् ।
असार २३ गते राति ९ बजे कार्यालयबाट निस्केका उनीहरु बुधबार मात्रै सम्पर्कमा आएका हुन् । प्रमुख प्रशासकीय अधिकृत हेमराज घर्तीमगर लगायत सात जना कर्मचारी बुधबार सम्पर्कमा आएको गाउँपालिकाका अध्यक्षा ऋषिकेष बुढामगरले बताएका छन् ।
कर्मचारीहरु गुल्मी गएको पत्ता लागेको छ । भुक्तानी गर्न नेपाल टेलिकमको नेटवर्कमा समस्या आएपछि रुकुम पूर्वमा गएर काम गर्ने भन्दै निस्किएका कर्मचारीहरू सम्पर्कविहीन भएका थिए । कर्मचारीहरु हराएपछि गाउँपालिकाले सूचना नै निकालेको थियो ।
साँझ ७–८ बजेदेखि बिहान ८ बजेसम्म नेटवर्कले काम नगर्ने भएपछि असार २३ गते राति उनीहरु थबाङबाट निस्किएका थिए ।
प्रमुख प्रशासकीय अधिकृतसहितका कर्मचारीहरू सम्पर्कविहीन भएपछि पालिकाले सूचना नै जारी गरेर उनीहरूलाई सम्पर्कमा आउन भनेको थियो ।
प्रमुख प्रशासकीय अधिकृतसँगै सहायक प्रशासक हरिश माझी, सह-लेखापाल यज्ञ प्रसाद कँडेल, सबइन्जिनियर चन्द्रप्रकाश ओली, सबइन्जिनियर निशा आचार्य, शिवकुमार वली र सवारी चालक प्रदीप केसी सम्पर्कविहीन भएका थिए ।
