काठमाडौं । रसुवामा आएको बाढीमा ११ जना बेपत्ता भएका छन् । उनीहरुको अवस्था अज्ञात छ ।
जिल्ला प्रशासन कार्यालय रसुवाका अनुसार रसुवागढी भन्सार, सुक्खा बन्दरगाह र टिमुरे सुक्खा बन्दरगाह क्षेत्रबाट ११ जना बेपत्ता भएका हुन् । तर अहिलेसम्म हताहतीको खबर आएको छैन ।
बाढीले रसुवागढी र केरूङ जोड्ने मितेरी पुलमा पनि ठूलो क्षति पुगेको छ ।
यसैबीच नुवाकोटको विदुरमा त्रिशूली नदीमा फसेका दुई जनाको हेलिकोप्टरबाट उद्धार गरिएको छ ।
बाढीमा फसेकाहरुको नेपाली सेनाको हेलिकप्टरले उद्धार गरेको हो । लामो समय रुखमा बस्दा थाकेपछि दुई जना स्थानीय फेरि जोखिम क्षेत्रमा झरेर बसेका थिए ।
चिनियाँ भूभागमा आएको भीषण वर्षासँगैको बाढीले रसुवामा पर्ने नेपाल–चीन जोड्ने मितेरी पुल बगाएको छ । यससँगै रसुवा हुँदै चीनसम्मको मार्ग बिच्छेद भएको छ ।
यस्तै भन्सारको यार्ड (ड्राइपोट) मा रहेका केही सवारी साधन बगाएको छ ।
बाढीका कारण त्रिशुली नदीको जल सतह ह्वात्तै बढेको छ ।
जिल्ला प्रशासन कार्यालय रसुवाले भने नदीमा ठूलो बाढी आएका सचेत रहन अनुरोध गरेको छ ।
फोटो- नेपाली सेना
