काठमाडौँ । कर्णाली विकास बैंक घोटाला आरोपमा तत्कालीन अध्यक्ष पशुपति दयाल मिश्र पक्राउ परेका छन् ।
मिश्रलाई बुधबार प्रहरीले बाँकेको नेपालगञ्जबाट पक्राउ गरेको हो ।
मिश्र नेकपा (एमाले)का केन्द्रीय सदस्य पनि हुन् । मिश्र २०७९ सालको स्थानीय तह निर्वाचनमा नेपालगञ्ज उपमहानगरपालिकाको मेयर पदमा पराजित भएका थिए । मिश्र २०६६ सालदेखि २०७५ सालसम्म कर्णाली विकास बैंकको अध्यक्ष थिए ।
कर्णाली विकास बैंकमा २ अर्ब ५० करोड भन्दा बढी रकम हिनामिना भएको सिआइबीको निष्कर्ष छ ।
सोही प्रकरणमा यसअघि कर्णाली डेभलपमेन्ट बैंकका तत्कालीन सञ्चालक ६५ वर्षीय राजेन्द्रवीर राय पनि पक्राउ परेका थिए । उनी उक्त बैंकका तत्कालीन प्रमुख कार्यकारी अधिकृतसमेत थिए । मिश्र भने फरार रहँदै आएका थिए ।
प्रहरीले उनीहरूविरूद्ध बैंकिङ कसुर तथा सजाय ऐन, २०६५ अन्तर्गत नेपाल राष्ट्र बैंकको समन्वयमा अनुसन्धान गरिरहेको छ ।
