काठमाडौँ । नेकपा (एकीकृत समाजवादी)का अध्यक्ष माधव नेपालविरुद्ध अभिव्यक्ति दिएकी नेतृ रामकुमारी झाँक्रीलाई पार्टीले स्पष्टीकरण सोधेको छ ।
पतञ्जली जग्गा प्रकरणमा भ्रष्टाचारको मुद्दा खेपिरहेका अध्यक्ष नेपाललाई लक्षित गर्दै ‘सिनो बोकेर हिँड्न नसकिने’ भन्दै अर्ली महाधिवेशनमार्फत नेतृत्व परिवर्तन गर्नुपर्ने अभिव्यक्ति दिएकी थिइन् ।
यस अभिव्यक्तिपछि नेकपा एसभित्र झाँक्रीप्रति चर्को पार्टीपंक्ति आक्रोशित बनेको छ । पार्टी अध्यक्ष विरुद्ध अभिव्यक्ति दिएपछि पार्टीले स्पष्टीकरण सोधेको हो ।
स्रोतका अनुसार अनुशासन आयोगले तीन दिने स्पष्टीकरण सोधेको बताइएको छ । उनको जवाफ आएपछि जवाफ हेरेर पार्टीले आवश्यक निर्णय गर्ने जनाइएको छ ।
