काठमाडौँ । सरकारले एकै पटक ठूलो संख्यामा सचिवहरुको विदेश भ्रमणमा स्वीकृत गरेको छ । सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले यही असार १३ गते बसेको मन्त्रिपरिषद् बैठकका निर्णयहरु सार्वजनिक गर्दै विभिन्न फोरमहरुमा भाग लिन जानका लागि सचिवहरुको भ्रमण स्वीकृत गरिएको जानकारी दिनुभएको हो ।
उहाँकाअनुसार सञ्चारसचिव राधिका अर्याल, खानेपानीसचिव प्रमिलादेवी शाक्य बज्राचार्य, भौतिक पूर्वाधार तथा यातायात सचिव केशवकुमार शर्मा, स्वास्थ्य तथा जनसंख्या मन्त्रालयका सचिव विकास देवकोटाको विदेश भ्रमणमा असार १३ को मन्त्रिपरिषद् बैठले स्वीकृत गरेको छ । सचिवदेखि मन्त्रीसम्मको विदेश भ्रमणको स्वीकृति क्याबिनेटबाट गराएर जानुपर्ने हुन्छ । त्यो भन्दा तलका पदको मन्त्रालय वा मन्त्रीले स्वीकृत गर्ने प्रचलन छ ।
उहाँले भन्नुभयो– ‘विभिन्न फोरमहरुमा भाग लिन निम्तो आउने गरेको छ । मलाइ (सञ्चारमन्त्री) लाई पनि निम्तो आएको थियो तर म अरु देश जाने भएँ । चीनमा हुने आइटीसम्बन्धि गोष्ठीमा भाग लिन सञ्चार सचिव जानुहुन्छ । यस्तै प्रकारले विभिन्न मन्त्रालयका सचिवहरुको भ्रमण स्वीकृत गरेका छौं । खानेपानी मन्त्रालयको सचिव पनि बाहिर जाँदै हुनुहुन्छ । भौतिक पूर्वाधार मन्त्रालयको सचिव पनि जाँदै हुनुहुन्छ । सञ्चार मन्त्रालयको पनि जाँदै हुनुहुन्छ । स्वास्थ्य तथा जनसंख्या मन्त्रालयको सचिव पनि बाहिर जाँदै हुनुहुन्छ । मन्त्रालयहरुको विदेश भ्रमणको प्रश्तावलाई हामीले स्वीकृत मात्रै गरेको हो ।’
सचिव मात्रै नभएर मन्त्रीहरु समेत विदेश भ्रमणमा जाँदै हुनुहुन्छ । मन्त्रीपरिषद् बैठकले २०८२ असार ३० गतेदेखि साउन १ गतेसम्म भियतनामको हनोईमा सञ्चालन हुने एक कार्यक्रममा कृषि तथा पशुपंक्षी विकास मन्त्रीलाई सहभागी हुन मन्त्रिपरिषद्ले स्वीकृति प्रदान गरेको छ । संस्कृति, पर्यटन तथा नागरिक उड्डयन मन्त्रीको पनि पेरिस भ्रमण स्वीकृत गरेको छ । त्यसो त, अहिले प्रधानमन्त्री नै विदेश भ्रमणमा हुनुहुन्छ ।
