काठमाडौं । सप्तरीको सुरुङ्गा नगरपालिका–८ मल्हनमा टोलमा डाँका समूहले गोली प्रहार गरी एक जनाको हत्या गरेको छ । गोली लागेर अर्का एक जना घाइते भएका छन् ।
सुरुङ्गा नगरपालिका–८ मल्हनवाका कान्तालाल चौधरीको गोली हानी हत्या भएको हो । कान्तालालका भाइ रामाकान्त घाइते भएका छन् । उनको प्रादेशिक अस्पताल लहानमा उपचार भइरहेको छ ।
गएराति १२ बजेतिर टोलमा पसेका लुटेराको समूहले लुटपाट गरेका थिए । ४–५ जनाको डाँका समूहले चौधरीको घरमा लुटपाट थालेपछि उनीहरुले प्रतिकार गर्दा कान्तलालमाथि धारिलो हतियार प्रहार भएको थियो । धारिलो हतियार प्रहार हुँदा घाइते भएका उनलाई पछि डाँका समूहले गोली प्रहार गर्दा घटनास्थलमै मृत्यु भएको थियो ।
घटनास्थलमा एउटा गोलीको खोखा र तीन वटा गोली पनि बरामद भएको छ ।
दाजुको घरमा होहल्ला भएको सुनेपछि भाइ रामाकान्त आएका थिए । उनीमाथि पनि डाँका समूहले टाउको र ढाडमा धारिलो हतियार प्रहार गरेका थिए ।
त्यसपछि डाँका समूहले पाँच तोला सुन, दुई केजी चाँदी र ५०/६० हजार नगद समेत लुटपाट गरेर फरार भएको स्थानीयले बताएका छन् ।
