काठमाडौं। नेकपा एकीकृत समाजवादीले पतञ्जली जग्गा प्रकरणमा अध्यक्ष माधव कुमार नेपालमाथि अख्तियार दुरुपयोग अनुसन्धान आयोगले राजनीतिक प्रतिशोधको आधारमा मुद्दा चलाएको ठहर गरेको छ।
बिहीबार पार्टी कार्यालय आलोकनगरमा बसेको बैठकले विगतदेखि चल्दै आएको षड्यन्त्रको निरन्तरता स्वरूप पूर्वाग्रही ढंगले नेपालमाथि प्रतिशोध लिएको निष्कर्ष निकालेको हो।
बैठकपछि सञ्चारकर्मीहरूसँग कुरा गर्दै पार्टीका प्रवक्ता प्रकाश ज्वालाले अध्यक्ष नेपालमाथि लागेको आरोपको कानुनी र राजनीतिक रूपमा प्रतिवाद गरिने बताए। उनले अदालतबाट क्लिनचिट लिएर यो कदम पूर्वाग्रही भएको सन्देश दिने दाबी गरे।
