आईपीएल फाइनलः तीन वर्षपछि नयाँ विजेता, १८ वर्षदेखि पहिलो उपाधिको खोजिमा दुबै टिम

काठमाडौँ । इन्डियन प्रिमियर लिग (आईपीएल) २०२५ को फाइनल खेल आज पञ्जाब किंग्स (पीबीकेएस)र रोयल च्यालेन्जर्स बैंगलोर (आरसीबी)बीच हुँदैछ । दुबै टोलि १८ वर्षदेखि पहिलो उपाधिको पर्खाइमा छन् ।

खेल अहमदाबादको नरेन्द्र मोदी स्टेडियममा साँझ ७ः४५ बजे सुरु हुनेछ । आईपीएलले ३ वर्षपछि नयाँ च्याम्पियन पाउनेछ । आईपीएलले अन्तिम पटक २०२२ मा नयाँ च्याम्पियन पाएको थियो, जहाँ गुजरात टाइटन्सले फाइनलमा राजस्थानलाई हराउँदै उपाधि चुमेको थियो ।

बैंगलोर चौथो पटक र पञ्जाब दोस्रो पटक फाइनलमा पुगेका छन् । यो दुई टोली बीचको पहिलो फाइनल हुनेछ । आरसीबीले २००९, २०११ र २०१६ मा फाइनल हारेको थियो भने पीबीकेएसले २०१४ मा एक मात्र फाइनल हारेको थियो ।

आईपीएलको इतिहासमा हालसम्म पीबीकेएस र आरसीबी बीच ३६ खेल खेलिएका छन् । दुवैले १८–१८ खेल जितेका छन् । दुवै टोली नरेन्द्र मोदी रंगशालामा दोस्रो पटक भिड्नेछन् ।

यस सिजनको क्वालिफायर–१ मा पनि यी दुई टोली आमनेसामने भएका थिए, जहाँ बैंगलोरले खेल ८ विकेटले जितेको थियो । यो सिजनमा यी दुई टोलीबीचको चौथो खेल हुनेछ । बैंगलोरले २ पटक र पञ्जाबले १ पटक जितेको छ ।