काठमाडौँ । नेपालले आईसीसी क्रिकेट विश्वकप लिग २ अन्तर्गत चौथो श्रृंखलाका खेलहरू खेल्दैछ ।
नेपालले आजदेखि स्कटल्यान्डमा सुरु हुने यस शृंखलामा घरेलु टिम स्कटल्यान्ड र नेदरल्यान्ड्ससँग दुई–दुई खेल खेल्नेछ ।
नेपाल र स्कटल्यान्डबीचको खेल दिउँसो पौने चार बजे सुरु हुनेछ । यसअघि लिग २ अन्तर्गत १२ खेलमा ६ अंक मात्रै जोडेको नेपाल हाल ८ टोली सहभागी लिगको अंक तालिकाको पुछारमा छ ।
यस शृंखला नेपालका लागि अवे मैदानमा अंक बटुलेर तालिकामा सुधार ल्याउने महत्वपूर्ण अवसर छ ।
पहिलो शृंखलामा घरेलु मैदानमा नेपालले नेदरल्यान्ड्ससँग १ जित हात पारेको थियो भने नामिबियासँग दुवै खेलमा पराजित भएको थियो ।
सेप्टेम्बरमा क्यानडामा भएको दोस्रो शृंखलामा ओमान र क्यानडासँग भएका खेलमा नेपालले कुनै जित निकाल्न सकेन ।
अमेरिकामा भएको तेस्रो शृंखलामा नेपालले स्कटल्यान्डलाई एक खेलमा हराएको थियो भने अमेरिकासँग दुवै खेलमा हार व्यहोरेको थियो । स्कटल्यान्डसँगको अर्को खेल भने वर्षाका कारण हुन सकेन ।
