काठमाडौँ । जलवायु परिवर्तनका असर न्युनिकरणका लागि वैश्विक साझेदारी आवश्यक रहेको नेताहरुले बताएका छन् ।
शुक्रवारबाट शुरु भएको सगरमाथा संवाद कार्यक्रममा देशको प्रतिनिधित्व गर्दै नेपाल आउनुभएका प्रतिनिधिहरुले जलवायु परिवर्तनको असर न्युनिकरण गर्न वैश्विक साझेदारी आवश्यक रहेको बताएका हुन् ।
जलवायु परिवर्तनसँग सम्बन्धित मुद्दामा भइरहेका छलफलमा हिमालको मुद्दा ओझेलमा पारिएकोप्रति असन्तुष्टि व्यक्त गरेका छन् । सगरमाथा संवादका क्रममा बोल्ने वक्ताहरुले हिमालदेखि महासागरसम्मको मुद्दालाई समेट्ने गरी जलवायु परिवर्तनबारे बहस जरुरी रहेको बताए । उद्घाटन सत्रपछिको पत्रकार सम्मेलनमा बोल्दै परराष्ट्रसचिव अमृतबहादुर राईले वक्ताहरुले जलवायु परिवर्तनसम्बन्धित विश्वमा भइरहेका छलफल, वार्ताहरुमा हिमालको विषयलाई अलिकति कम उठाउने गरेकोमा नेपालले हिमालको विषय विश्व जलवायु संवाद र छलफलमा उठाउन नेतृत्वदायी भुमिका खेलेको भन्दै धन्यवाद व्यक्त गरेको बताउनु भयो । सगरमाथा संवादका क्रममा अहिलेसम्म १९ वटा मन्तव्यहरु प्रश्तुत भएको बतउनु भयो । जसमा १३ वटा देशका प्रतिनिधिहरु हुनुहुन्छ भने ६ वटा संयुक्त राष्ट्रसंघ लगायत अन्तर्राष्ट्रिय र क्षेत्रीय संघसंस्थाका प्रतिनिधिहरुले विचार राख्नुभएको बताउनु भयो । अब दुई वटा प्यारलल सेसनहरु सञ्चालन हुने र त्यसपछि काठमाडौं घोषणा पत्र जारी गर्ने बताउनु भयो ।
उहाँले भन्नुभयो, ‘जलवायु परिवर्तनसम्बन्धित विश्वमा भइरहेका छलफल, वार्ताहरुमा हिमालको विषयलाई अलिकति कम उठाउने गरेकोमा नेपालले हिमालको विषय विश्व जलवायु संवाद र छलफलमा उठाउन नेतृत्वदायी भुमिका खेल्नुपर्छ भन्ने उद्देश्यका साथ यो पहिलो सगरमाथा संवाद कार्यक्रमको आयोजना गरिएको हो । सफलतापूर्वक उद्घाटन सत्र सम्पन्न भएको छ । १९ वटा वक्तव्यहरु भएका छन् । त्यसमध्ये १३ वटा देशका प्रतिनिधिहरुले आफ्नो वक्तव्य राख्नुभएको छ भने ६ वटा संयुक्त राष्ट्रसंघ लगायत अन्तर्राष्ट्रिय र क्षेत्रीय संघसंस्थाका प्रतिनिधिहरुले विचार राख्नुभएको छ । हामी अब दुई वटा प्यारलल सेसनहरु गर्दछौँ तीन दिनसम्म । हामीले काठमाडौं घोषणा पत्र जारी गर्छौं । अबको दिनमा नेपालले हिमालको विषयमा कसरी नेतृत्व लिन्छ र कुन बाटो हिँड्छ, विश्व जलवायु छलफललाई कुन बाटोमा हिँडाउन चाहन्छ भन्नेमा हामी काठमाडौं घोषणा पत्र जारी गर्दैछौँ । जलवायु परिवर्तनको विषय एउटा मात्रै देशले समाधान गर्न सक्दैन । त्यसमा क्षेत्रीय, विश्वका सबै देशका साझेदारी आवश्यक पर्दछ । जसले बढी पोलुसन गरिरहेको छ, त्यसले बढी कन्ट्रिब्युट गर्नुपर्दछ ।’
उहाँले जलवायु परिवर्तनको असर एउटा देशको प्रयासले मात्रै समाधान नहुनेतर्फ विश्व नेताहरुले विश्वको ध्यानाकर्षण गराएको पनि बताउनु भयो ।
