काठमाडौँ । नेपाली काँग्रेसका सभापति शेरबहादुर देउवाको सूचना विना नै पौडेल पक्षीय काँग्रेस नेताहरुले आज पार्टी अफिसमा छुट्टै भेला बोलाएका छन् । देउवा समुहले विभागलाई पूर्णता दिन थालेपछि नेपाली कांग्रेसका वरिष्ठ नेता रामचन्द्र पौडेल समुह असन्तुष्ट हुन थालेको छ । पौडेल समूहले पार्टी कार्यालय सानेपा नै केन्द्रीय सदस्यहरुको भेला बोलाएको छ । नेता पौडेलले आफैले फोन गरेर केन्द्रीय सदस्यहरुलाई छलफल गर्न भन्दै पार्टी कार्यालयमा बोलाएका हुन् ।
केन्द्रीय सदस्य कल्याण गुरुङले समयसामयिक विषयमा छलफल गर्नका लागि दिउँसो २ बजे पार्टी केन्द्रीय कार्यालय सानेपामा छलफल गर्न बोलाएको बताएको बताएका थिए । मंगलबार मात्र राप्रपा छाडेर कांग्रेसमा प्रवेश गरेका सुनिल थापाको कांग्रेस प्रवेशमा समेत पौडेल समुह पूर्ण सन्तुष्ट छैन् । सभापति देउवाले महाधिवेशनको मुखमा विभागलाई पूर्णता दिने अन्य पार्टीबाट विभिन्न नाममा पार्टी प्रवेश गराएर पार्टी कब्जा जमाउन लागेको शंका गरेको छ ।
केन्द्रीय विभाग संयोजक तोकिएकामध्ये, तरुण दल, महिला विभाग आदिलाई पूर्णता दिन थालेको, क्रियाशील सदस्यता वितरण गर्दा नवप्रवेशीलाई प्राथमिकता दिएको नेविसंघ र नेपाल तरुण दललाई पूर्णता दिन नसकेको विषयमा पौडेल समूह असन्तुष्ट बनेको छ । सभपाति देउवाले आफूइत्तरका विदेशस्थित नेपाली जनसम्र्क समितिका संयोजक र पदाधिकारीलाई अनुशासनको कारबाही गर्न थालेको आदि विषयमा दुइ साताअघि पौडेलको सम्पर्क कार्यालयमा बैठक बसी पौडेल समूहले आपत्ति जनाएको थियो ।
यसअघि पौडेल समूहले नै लामो समयदेखि विभाग गठन गर्न माग गरेको थियो । तर सभापति देउवाले महाधिवेशन प्रभावित पारी विभागहरु गठन गर्न थालेको पौडेल समूहको आरोप छ । सभापति देउवाले आफ्नो पक्षमा पार्न खोजेको भन्दै पौडेल समूहले गत साउन १ गते सभापति देउवालाई ध्यानकर्षण पत्र नै पार्टी केन्द्रीय कार्यालयमा बुझाएको थियो । पछिल्लो समयमा थापासहितका नेता राप्रपाबाटा कांग्रेस प्रवेश गर्ने औपचारिक कार्यक्रममा बोल्दा समेत पौडेलले कांग्रेसमा धेरै संघर्ष, त्याग र योगदान दिएका व्यक्तिहरु रहेको उल्लेख गरेका थिए । उनले थापाको पार्टी प्रवेशबाट आफूहरु सन्तुष्ट नभएको बताएका छन् ।
