बाँके। सुदूरपश्चिम र कर्णाली प्रदेशका ३० किशोरीलाई दक्ष (साथी सहजकर्ता) बनाउन थालिएको छ । समुदायस्तरमा किशोर किशोरीको समूहलाई सचेतना अभिवृद्धिका लागि किशोरीलाई प्रशिक्षक प्रशिक्षण तालिममार्फत दक्ष बनाउन लागिएको हो ।
किशोरीलाई दक्ष बनाउन १२ दिने रुपान्तरण प्रशिक्षक प्रशिक्षण तालिम नेपालगञ्जमा सञ्चालन गरिएको छ । तालिममा रुपान्तरणका १५ विषयवस्तु मेरो सेरोफेरो, आत्म जागरण, अधिकार र कर्तव्य, लिङ्ग र लैङ्गिकता, किशोरावस्था, राम्रो बानी, पोषण, नागरिक सहभागिता, प्राथमिक उपचार, खर्च र बचत, यौन तथा प्रजनन अधिकारलगायत विषयमा आधारित ज्ञान प्रदान गरिने युनिसेफको क्षेत्रीय कार्यालय धनगढीका बालसंरक्षण अधिकृत प्रकाश कैनीले बताउनुभयो ।
शसक्त महिला समृद्ध नेपाल परियोजनाअन्र्तगत सामुदायिक विकास केन्द्र डोटी र आवाज सुर्खेतद्वारा आयोजित तालिममा कालीकोट, दैलेख, रुकुम पश्चिम, सुर्खेत बाजुरा, डोटी र कञ्चनपुरका ३० जना किशोरीको सहभागिता छ । तालिम पश्चात् सहभागीले समुदायस्तरमा छुट्टाछुट्टै ४२ वटा सत्र सञ्चालन गर्नुपर्ने परियोजना कार्यक्रमका संयोजक शर्मिला पौडेलले बताउनुभयो ।
उहाँका अनुसार दुर्गम ग्रामीण क्षेत्रका किशोरकिशोरीको जीवनशैली परिवर्तन गर्न यो कार्यक्रम सञ्चालन गरिएको हो । मन्दिप सुरी र सरु शिल्पकारले प्रशिक्षण दिनुहुने छ । रासस
