काठमाडौँ । काठमाडौँ महानगरपालिकाका मेयर बालेन शाहले प्रमुख प्रशासकीय अधिकृत सरोज गुरागाईंलाई कार्यालयमा हाजिर हुन नदिन महानगर प्रहरी परिचालन गरेका छन् ।
वडाध्यक्षहरु र कर्मचारीले प्रमुख प्रशासकीय अधिकृतमा गुरागाईंलाई हाजिर गराउने तयारीस्वरुप कमलादीस्थित महानगरपालिकाको कार्यालयमा जम्मा भएपछि मेयर बालेनले नगर प्रहरी परिचालन गरेका हुन् ।
महानगरका प्रवक्ता नवीन मानन्धरले प्रमुख प्रशासकीय अधिकृत गुरागाईँ महानगरमा आउनैपर्ने बताए । ५ महिनादेखि तलब नपाएको र महानगरको काम ठप्प भएकोले प्रशासकीय अधिकृत हाजिर हुनुपर्ने उनले बताए ।
काठमाडौं टावरको नक्सा पासमा अनियमितता गरेको भन्दै मेयर बालेनले गुरागाईँलाई अघोषित निलम्बनमा राखेका थिए । उनलाई कार्यालयमा प्रवेश निषेध गरिएको थियो ।
मेयर साहले गुरागाईंलाई हटाएर नयाँ प्रमुख प्रशासकीय अधिकृतको लागि संघिय मामिला तथा सामान्य प्रशासन मन्त्रालयमा पत्र पठाएका थिए । तर, जवाफमा मन्त्रालयले उनैलाई निरन्तरता दिन र काम गर्ने वातावरण बनाउन भन्दै महानगरलाई पत्र पठाएको थियो ।
