गुल्मी। गुल्मीका उत्कृष्ट चार सहकारी सम्मानित भएका छन् । जिल्ला सहकारी सङ्घ गुल्मीले आज अन्तरराष्ट्रिय सहकारी दिवसको अवसरमा उनीहरुलाई सम्मान गरेको हो ।
बहुउदेश्यीय सहकारीतर्फ मैत्री बहुउदेश्यीय सहकारी संस्था, महिला सहकारीतर्फ अमरकल्याण महिला विकास बहुउदेश्यीय सहकारी संस्था, बचत ऋण सहकारीतर्फ लेकाली स्वावलम्बन बचत तथा ऋण सहकारी संस्था र कृषि सहकारीतर्फ बाँसखर्क कृषि सहकारी संस्था सम्मानित भएका छन् ।
सम्मानित हुने सहकारीका अध्यक्ष र व्यवस्थापकलाई कार्यक्रमका प्रमुख अतिथि लुम्बिनी प्रदेशका अर्थमन्त्री धनेन्द्र कार्कीले सम्मानपत्रले प्रदान गर्नुभयो । विसं २०५७ मा स्थापना भएको मैत्री सहकारीमा हाल १४ हजारभन्दा बढी शेयर सदस्य छन् । हाल मैत्रीको शेयर पुँजी रु ५८ करोड छ, भने २० शाखा कार्यालय रहेका छन् ।
विसं २०६२ मा स्थापना भएको अमरकल्याण महिला सहकारीले हिंसा पीडित महिलाका लागि अल्पकालीन आश्रय उपलब्ध गराएको छ, भने सहकारीको आफ्नै भवन रहेको छ । विसं २०५० मा स्थापना भएको लेकाली स्वावलम्बन सहकारीमा हाल चार हजार ३९ शेयर सदस्य छन् । सहकारीमा हाल रु ६८ करोड बढीको कारोबार छ ।
कार्यक्रममा प्रदेशका अर्थमन्त्री कार्कीले सहरका ठूला सहकारीमा समस्या देखिए पनि गाउँका सहकारीमा समस्या नदेखिएको बताउनुभयो । सहकारीको ऋणले गाउँको जीवनस्तर नै परिवर्तन भएको उहाँको भनाइ थियो । प्रदेशसभा सदस्य डिल्लीराज भुसालले गाउँका सहकारी आयआर्जनको ठूलो माध्यम भएको बताउनुभयो । रासस
