तनहुँ। एक सय ४० मेगावाट क्षमताको तनहुँ जलविद्युत् आयोजनाले एक सय चार हेक्टरभन्दा बढी क्षेत्रफलमा वृक्षारोपण गरेको छ । आयोजना निर्माण गर्दा रुख कटान भएबमोजिम क्षतिपूर्तिवापत १०४ दशमलव २१ हेक्टर जग्गामा वृक्षरोपण गरिएको आयोजनाले जनाएको छ ।
आयोजना प्रमुख श्यामजी भण्डारीले आयोजना निर्माण गर्दा रुख कटान भएपश्चात् वृक्षरोपण गर्नुपर्ने प्रावधानअनुसार आयोजनाका तर्फबाट बिरुवा रोपिएको जानकारी दिनुभयो । कार्यालयले थप १७ सामुदायिक वन क्षेत्रमा क्षतिपूर्ति स्वरुप वृक्षरोपणको तयारी गरेको उहाँले बताउनुभयो । त्यसका लागि गण्डकी प्रदेश वन मन्त्रालयका सचिवबाट अनुगमन गरी आयोजनाका पदाधिकारी र डिभिजन वन कार्यालय तनहुँका प्रमुखसँग छलफल भएको छ ।
आयोजनालाई आवश्यक वन क्षेत्रको जग्गा प्रयोग र त्यहाँ रहेका रुख, बिरुवा हटाउने, क्षतिपूर्ति, वृक्षारोपणलगायत विषयमा छलफल गरिएको भण्डारीको भनाइ छ ।
यस्तै, आयोजनाले म्याग्दे गाउँपालिका–३ स्थित सिद्धबतासन सामुदायिक वन उपभोक्ता समूहमा पोखरी निर्माण गरेको छ । आयोजनाको वन तथा वन्यजन्तु व्यवस्थापन योजनाअन्तर्गत वन्यजन्तुको सहज आवतजावत तथा बासस्थान संरक्षणका लागि पोखरी निर्माण गरिएको हो ।
साथै मत्स्य व्यवस्थापन योजनाअन्तर्गत ऋषिङ गाउँपालिका–१ झापुटारस्थित आयोजना कार्यालय तथा आवास परिसरमा मत्स्य ह्याचरी बाहिर रहने संरचना निर्माण गरिएको पनि आयोजनाले जनाएको छ । ह्याचरीमा आवश्यक पर्ने पानी आपूर्ति र त्यसको नमूना परीक्षण गरिएको छ भने परीक्षणका लागि माछाका भुर्रा छाडिएको आयोजना प्रमुख भण्डारीले बताउनुभयो । रासस
