काठमाडौं । लेखक तथा कुटनीतिज्ञ कमल कोइरालाको आज निधन भएको छ । सिनामंगलस्थित केएमसी अस्पतालमा उनको मृत्यु भएको हो । नेकपा एकीकृत समाजवादीका महासचिव घनश्याम भुसालले सामाजिक सञ्जालमार्फत् कमल कोइरालाको निधन भएको पुष्टि गर्नुभएको छ ।
कोइरालाको शव श्रद्धाञ्जलीका लागि भोलि बिहान ११ बजे पार्टी कार्यालय आलोकनगरमा राखिने पत्रकार किशोर श्रेष्ठले जानकारी दिए ।
कोइरालालाई केही दिनअघि पक्षघात भएपछि अस्पताल भर्ना गरिएको थियो । बानेश्वरस्थित आफ्नै निवासमा ढलेपछि उनलाई अस्पताल भर्ना गरिएको थियो ।
कोइरालाको शरीर पूर्ण रूपमा प्यारालाइज्ड भएको थियो । उनलाई छोरी र ज्वाइँले केएमसी अस्पताल पुर्याएका थिए । अस्पतालको इमर्जेन्सीमा चेकजाँच पश्चात् आइसीयूमा राखेर उपचार गरिएको थियो ।
कमल कोइराला भूतपूर्व प्रधानमन्त्री मातृकाप्रसाद कोइरालाका छोरा र बिपी कोइराला भतिज हुन् । उनी नेपालका लागि कोरियाका राजदूत बनेका थिए । लामो समयदेखि उनी लेखन कार्यमा सक्रिय छन् ।
कोइराला अमेरिका जाने तयारीमा थिए । अमेरिकामा उनका छोरा छन् ।
