काठमाडौँ । नेपाल विद्युत प्राधिकरणको पूर्वकार्यकारी निर्देशक कुलमान घिसिङले दायर गरेको रिट सर्वोच्च अदालतका प्रधानन्यायाधीश प्रकाशमान सिंह राउत र न्यायाधीश शारंगा सुवेदीको इजलासमा पेसी तोकिएको छ ।
उक्त रिटको सुनुवाइ आज सर्वोच्च अदालतको आठौँ नम्बरमा परेको छ ।
यसअघि, गत शुक्रवार न्यायाधीश अब्दुल अजिज मुसलमानको इजलासले अन्तरिम आदेश जारी गर्न अस्वीकार गर्दै विपक्षी प्रधानमन्त्री तथा मन्त्रिपरिषद् कार्यालयलगायतलाई लिखित जवाफ पेस गर्न आदेश दिएको थियो ।
आफूलाई पदमा निरन्तर कायम राख्नुपर्ने, कुलमानलाई जिम्मेवारी दिन नहुने माग राखी नवनियुक्त कार्यकारी निर्देशक हितेन्द्रदेव शाक्यले चार वर्षअघि दायर गरेका रिट पनि न्यायाधीश राउत र सुवेदीको इजलासमा छ ।
उनीहरू दुवैले सरकारको निर्णय अन्यायपूर्ण रहेको जिकिर गर्दै न्यायिक पुनरावलोकनको माग गरेका छन् । यसमा सरकारका तर्फबाट पेस हुने लिखित जवाफपछि मात्रै अन्तरिम आदेशबारे निर्णय हुनेछ ।
