काठमाडौं । पूर्वराजा ज्ञानेन्द्र शाहले अहिले देशमा शान्ति चाहिएको बताउनु भएको छ ।
गोरखा दरबारस्थित गोरखकाली र गोरखनाथको दर्शन तथा पूजा अर्चनापछि सञ्चारकर्मीहरुसँग कुरा गर्दै पूर्वराजा शाहले यस्तो बताउनु भएको हो । पूर्वराजा शाह आज बिहान गोरखा पुग्नु भएको थियो ।
उहाँले भन्नुभयो “गोरखा आएर मलाई खुसी लाग्यो आफ्नो जन्म थलो त होइन तर पुर्खाको थलो हो। सबैलाई भेट्दा पनि खुसी लागेको छ। अहिले देशमा शान्ति चाहिएको छ, कसैले कसैको पनि कुभलो नचिताओस्, भलो चिताओस् र केही खराब नचिताओस् भन्ने मेरो कामना छ। कोही पनि केही गर्नलाई पनि डराउनु पर्दैन। देशको शान्ति कायमै होस्, देशमा विकास होस्। सबैलाई सुख र समृद्धि होस् भन्ने कामना छ।”
गोरखकाली मन्दिर शाहवंशीय राजाहरुले कुलदेवताका रुपमा पुज्दै आएको छ । गोरखकाली र गोरखनाथ मन्दिरमा पूजाअर्चना गर्दै शाहले भूकम्पपछि पुनर्निर्माण भएको गोरखा दरबारको अवलोकन समेत गर्नुभएको छ ।
गोरखा दरबारमा पूर्वराजालाई स्थानीयले भब्य स्वागत गरेका थिए । उहाँका समर्थकहरुले राजतन्त्रको पक्षमा नाराबाजी समेत गरेका थिए ।
