काठमाडौं । पूर्वराजा ज्ञानेन्द्र शाह शक्तिपीठको दर्शनका लागि गोरखाको गोरखकाली मन्दिरमा पुग्नुभएको छ ।
पूर्वराजा शाह विभिन्न शक्तिपीठको दर्शन गर्ने क्रममा आज गोरखाकाली मन्दिर पुग्नुभएको हो । उहाँले गोरखनाथ, गोरखकाली तथा मनकामना मन्दिरमा पूजा अर्चना गर्ने कार्यक्रम छ ।
गत फागुन ६ गते प्रजातन्त्र दिवसका अवसरमा आफूलाई सहयोग गर्न भिडियो सन्देश जारी गरेका पूर्व राजा शाह त्यसपछि विभिन्न शक्ति पीठको दर्शन गर्ने नाममा सर्वसाधारणसँग भेटघाटलाई तीव्र बनाउनुभएको छ ।
यस्तै एक महिना पोखरा बसाइपछि काठमाडौं फर्किएका उहाँलाई त्रिभुवन विमानस्थलमा राजावादीहरूले भव्य स्वागत गरेका थिए ।
