काठमाडौं । काठमाडौंको स्वर्णलक्ष्मी सहकारीको बचत अपचलनमा धरौटीमा छाड्ने काठमाडौं जिल्ला अदालतको आदेशविरुद्ध राष्ट्रिय स्वतन्त्र पार्टीका सभापति रवि लामछिाने आज उच्च अदालतमा जाने भएका छन् ।
काठमाडौं जिल्ला अदालतले गत माघ २ गते रवि लामिछानेलाई धरौटीमा छाड्न आदेश दिएको हो । सो आदेशविरुद्ध पुनरावेदन निवेदन लिएर लामिछाने आज ११ बजे उच्च अदालत पाटनमा जाने बताइएको छ ।
स्वर्णलक्ष्मी बहुउद्देश्यीय सहकारी संस्था ठगी प्रकरणमा लामिछानेलाई ६० लाख रुपैयाँ धरौटीमा रिहा गर्न गत माघ २ गते काठमाडौं जिल्ला अदालतले आदेश दिएको थियो ।
थुनछेक बहसपछि काठमाडौँ जिल्ला अदालतका न्यायाधीश माधव अधिकारीको इजलासले सो आदेश दिएको हो । योसँगै लामिछानेले हिरासत बाहिर बसेर नै मुद्दाको पुर्पक्ष गरिरहेका छन् ।
तर धरौटी लिने अदालतको निर्णयविरुद्ध उनी उच्च अदालतमा जान लागेका हुन् । उनले साधारण तारिखको माग गर्ने छन् ।
गोरखा मिडिया नेटवर्कमा कानुन विपरीत स्वर्णलक्ष्मी बहुउद्देश्यीय सहकारी संस्थाबाट ५ करोड ७८ लाख ९८ हजार ४८० रुपैयाँ लगेको प्रहरीको अनुसन्धान निष्कर्ष छ । रविविरुद्ध ५ करोड ७८ लाख ९८ हजार ४८० रुपैयाँ बिगो माग दाबी गरिएको छ ।
