एजेन्सी । ओन्टारियो प्रान्तले तीन अमेरिकी राज्यमा विद्युत् अतिरिक्त भन्सार लगाएपछि अमेरिकी राष्ट्रपति डोनाल्ड ट्रम्पले सोमबार क्यानाडालाई ‘भन्सार शुल्क दुरुपयोगकर्ता’ भन्दै संयुक्त राज्य अमेरिकालाई क्यानाडाको ऊर्जाको आवश्यकता नभएको दाबी गर्नुभएको छ ।
क्यानाडाको सबैभन्दा धेरै जनसङ्ख्या भएको प्रान्त ओन्टारियोका नेताले सोमबार मिशिगन, मिनेसोटा र न्युयोर्कमा विद्युत् निर्यातमा २५ प्रतिशत अतिरिक्त भन्सार शुल्क थप्न लागेको बताउनुभयो । ओन्टारियोले यी तीन राज्यमा १५ लाख घर र व्यवसायहरूलाई विद्युत आपूर्ति गर्छ ।
“ओन्टारियोले अहिले ‘विद्युत्’ मा, सबै कुरामा २५ प्रतिशत अतिरिक्त भन्सार शुल्क घोषणा गर्यो”, प्रान्तलाई ‘त्यसो गर्न अनुमति नै थिएन’ भन्ने दाबी गर्दै ट्रम्पले आफ्नो ट्रुथ सोसल प्लेटफर्ममा भन्नुभयो, “क्यानाडा भन्सार दुरुपयोगकर्ता हो र सधैँ रहिआएको छ, तर संयुक्त राज्य अमेरिकाले अब क्यानाडालाई अनुदान दिने छैन, हामीलाई तिमीहरूको कारहरू चाहिँदैन, हामीलाई तिमीहरूको काठ चाहिँदैन, हामीलाई तिमीहरूको ऊर्जा चाहिँदैन, र चाँडै नै, तिमीहरूले त्यो थाहा पाउनेछौ ।”
कथित व्यापार असन्तुलनलाई सुधार्न खोज्दै ट्रम्पले अप्रिल २ देखि सबै देशमा ‘पारस्परिक’ भन्सार शुल्क लगाउने वाचा गर्नुभएको छ ।
उहाँले ट्रुथ सोशल पोस्टमा लेखेर त्यसो गर्ने पुष्टि गरेजस्तो देखिन्छ, “किनभने हाम्रो भन्सार शुल्कहरू पारस्परिक छन्, हामी अप्रिल २ मा सबै फिर्ता पाउनेछौँ ।”
ट्रम्पले बारम्बार क्यानाडाको विलयको बारेमा बोल्नुभएको छ र द्विपक्षीय व्यापार, क्यानाडाको अर्थतन्त्रको जीवनरक्त, भन्सार शुल्क कार्यहरूद्वारा अराजकतामा फ्याँकिएको छ जुन उहाँले पदभार सम्हालेदेखि विभिन्न दिशामा सरेका छन् ।
उहाँले बिहीबार केही छुटहरू घोषणा गर्नुअघि गत मङ्गलबार क्यानाडा र मेक्सिकोको आयातमा २५ प्रतिशत कर लगाउने अनुमति दिनुभएको थियो ।
तर क्यानाडाको लगभग ६२ प्रतिशत आयात अझै पनि नयाँ करहरूद्वारा प्रभावित भयो । तिनीहरू मध्ये धेरै १० प्रतिशतको कम भन्सार शुल्क भएका ऊर्जा स्रोतहरूमा छन् ।
बुधबार स्टिल र एल्युमिनियम आयातमा ट्रम्पको २५ प्रतिशत भन्सार शुल्क लागू हुनेछ । यसले क्यानाडालाई पनि असर गर्नेछ ।
ओन्टारियोका प्रिमियर डग फोर्डले सोमबार भन्नुभयो, “भन्सार शुल्कको खतरा सदाका लागि नहटेसम्म ओन्टारियो नरम हुनेछैन ।”
“केही शुल्कहरू रोक्दै, अन्तिम क्षणको छुटहरू दिँदै – यसले काम गर्दैन । हामीले अराजकता सधैँका लागि अन्त्य गर्नुपर्छ । हामीले बस्नुपर्छ, सँगै काम गर्नुपर्छ र निष्पक्ष सम्झौता गर्नुपर्छ”, उहाँले एक पत्रकार सम्मेलनमा भन्नुभयो, “त्यस समयसम्म ओन्टारियोले लडाइँ जारी राख्नेछ।।। त्यसैले आज हामी मिनेसोटा, मिशिगन र न्युयोर्कमा विद्युत् निर्यातमा २५ प्रतिशत अतिरिक्त भन्सार शुल्क अगाडि बढाउँदैछौँ ।”
औसतमा अतिरिक्त भन्सार शुल्कले तीनवटा राज्यका बासिन्दाहरूको बिलमा प्रति महिना लगभग एक सय डलर थप्ने फोर्डले बताउनुभयो ।
“मलाई स्पष्ट पार्न दिनुहोस्स् म यो शुल्क बढाउन हिच्किचाउने छैन । यदि आवश्यक परेमा यदि संयुक्त राज्य अमेरिकाले तनाव बढाएमा, म विद्युत् पुरै बन्द गर्न हिच्किचाउने छैन”, उहाँले भन्नुभयो ।
“आफ्नो आकाश छुने विद्युत् बिल तिर्न सङ्घर्ष गरिरहेका मिनेसोटावासीहरू ट्रम्पको व्यापार युद्धका पहिलो पीडितहरू थिए”, नोभेम्बरको निर्वाचनमा ट्रम्पसँग पराजित डेमोक्रेट कमला ह्यारिसका रनिङ मेट मिनेसोटाका गभर्नर टिम वाल्जले एक्समा भन्नुभयो, “मिनेसोटाले ट्रम्पको अर्बपतिहरूले चलाएको अर्थतन्त्र धान्न सक्दैन । हामीले यो पागलपनलाई रोक्नुपर्छ ।”
