काठमाडौं । कोरोनाको बढ्दो संक्रमणका कारण देशको आधाभन्दा बढी भू–भागमा यतिबेला लकडाउन देखि निषेधाज्ञासम्म जारी रहेको भन्दै प्रमुख प्रतिपक्षी काँग्रेसले देशको राजधानी काठमाडौ उपत्यका निषेधाज्ञाका कारण एक ढंगले ठप्प स्थितिमा रहेको र यसले समग्र जन जीवनलाई कष्टकर बनाएकोले सरकारले यस विषयमा गम्भीर बन्न भनेको छ ।
काँग्रेसले नियमित जीवनमा ब्यवधान ब्यहोरेर जनताले कोरोना विरुद्धको संघर्षलाई साथ दिइरहेका छन् भन्दै ‘सरकारमा संगै नरहेर पनि संकटमा संगै लड्न सकिन्छ भन्ने मान्यता पुनः दोहो¥याउंदै नेपाली कांग्रेस कोरोना विरुद्धको संघर्षमा संयम, सशक्तता र एकताका लागि सरकार र समुदायमा हार्दिक अपील गरेको छ ।
काँग्रेसका प्रवक्ता विश्वप्रकाश शर्माले आज जारी गरेको विज्ञप्तिमा भनिएको छ, लकडाउन या निषेधाज्ञा आफैमा समाधान होइनन्, भन्ने पुष्टि हाम्रै निकट अतीतको एकसय बीस दिन लामो लक डाउनले गरिसकेकै छ । केवल रक्षात्मक रणनीति मात्रै हुन् लक डाउन र निषेधाज्ञा । कोरोना विरुद्धको संघर्षलाई चुस्त बनाउन यो स्थितिको उपयोग गर्ने अधिकतम क्षमता अब सरकारले प्रस्तुत गर्न सक्नुपरेको छ ।
उनले भनेका छन्, नेपाली कांग्रेस आग्रह गर्दछ— विगतमा गरिएका कमजोरी र गल्तिहरुबाट पाठ सिकेर युद्धस्तरमा कार्य गर्ने स्थितिको विकास हाल जारी निषेधाज्ञाको समयमा गरियोस् ।
चैत्र महिना देखि सवासय दिनसम्मको लक डाउनमा देशले कोरोना विरुद्धको संघर्ष भन्दा सत्ताको द्वन्द्व, भ्रष्टाचार र प्रधानमन्त्रीका हलुका एवं विवादास्पद अभिव्यक्तिहरु बढी सुन्यो, देख्यो र भोग्यो । निषेधाज्ञाको अबको चरणमा यी बिषयलाई निषेध गरेर अघि बढ्ने इच्छाशक्ति र सामथ्र्य देशले खोजेको छ, सो विज्ञप्तिमा भनिएको छ ।
सो विज्ञप्तिमार्फत काँग्रेसले प्रतिकुल वातावरण विच फ्रन्ट लाइनमा कार्य गरिरहेका स्वास्थकर्मी देखि सफाइकर्मी सम्म अनि सुरक्षा ब्यवस्थापन सम्हालिरहेका सुरक्षाकर्मी देखि सूचना सम्प्रेषण गरिरहेका संचारकर्मी सम्मलाई उच्च सम्मान गर्दै नेपाली कांग्रेस उहाँहरुका लागि आवश्यक पर्ने भौतिक सामग्री देखि मनोबैज्ञानिक सहजता सम्मको सम्पूर्ण सहजीकरणमा कुनै सम्झौता नगरी कार्य गर्न सरकारलाई अपील र आग्रह गरेको छ ।
निषेधाज्ञा लम्बिन सक्ने स्थितिमा श्रमिक, बिद्यार्थी, बेरोजगार युवा, एकल महिला, अपांगता भएका नागरिक आदिलाई हातमुख जोर्न संकट पर्न सक्ने अवस्था आउनेछ भन्दै सो विज्ञप्तिमा त्यसबारेमा समयमै दृष्टी र योजना निर्माण गरिराख्नु जिम्मेवार राज्यको कर्तव्य रहेकोले नेपाली कांग्रेस ती सबै बर्ग र समुदायका तर्फबाट सरकारलाई यसबारे आवश्यक ध्यानाकर्षण गराउन चाहन्छ भनिएको छ।
