बोल्ने कोही छैन, गाँउमा बोल्ने कोही छैन
पाहुना आउँदा घरको ढोका खोल्ने कोही छैन ।
गायक शिशिर योगीको यो गीत जस्तै यसपटक घर गाउँमा मान्छे भएर पनि चाडपर्वकामा पाहुनका लागि ढोका खोलिदिने कोहि भएनन् । आफन्त छोरी चेली, पाहुनालाई बोलाएर आगन थर्काउँदै नाचगान गर्ने रमाइलो सायद महामारीका कारण नेपालमा इतिहासमा पहिलो पटक रोकियो होला । आज सबै घरमा नै बसे । चाडपर्वको रमाईलो माने झैँ गरेर चार किल्लामा बन्दि भए ।
अरु त अरु भक्तजनलाई आशिर्वाद दिने भगवान पनि भक्तजनको प्रतिक्षामा नै बसे, मन्दिर भित्रै। मुख्य चाडपर्वहरुमाा खुट्टा राख्ने ठाउँ नहुने शिवालयहरुमा यस पटक खुट्टा टेकिदिने पनि कोहि भएनन् । अघिल्ला वर्षहरुमा आज पशुपतिनाथमा कति नारीहरु पुग्थे कुनै लेखाजोखा नै हुदैनथ्यो । कोरोनको कहरका कारण भगवान पनि मन्दिर भित्रै सीमित हुन पुगे । यो महामारीले भक्तजन र भगवानबीच पनि यस पटक सामाजिक दुरी बनाइदियो । यस्तो दुरी बनाइदियो कि सरकारले धेरै मानिस जम्मा हुन्छन् भनेर आजकै लागि लक्ष्य गरेर निषेधाज्ञा जारी गर्नुपर्यो ।
कोरोनाको कहर बढ्दै जाँदा कि सरकारको भर नभए पशुपतिनाथको भर भनेको अवस्थाम यस पटक भक्तजन र भगवानको सामाजिक दुरी कायम रहेका कारण कति कुरा सुने कति सुनेनन् पशुपतिनाथले । पछिल्लो समय करिब ५० लाख राजधानी उपत्याबासीको रिफ्रेस हुने एक निकास चन्द्रागिरि डाँडामा रहेका प्रसिद्ध भालेश्वर महादेव पनि यस पटक भक्तजनको कुराईमा परे । भालेश्वर महादेवले पूर्वतर्फको राजधानी उपत्यकालाई चिहाइ मात्र रहे, कोही माथि उक्लिन सकेनन् । गतवर्ष तीज र साउनको सोमबारमा छिचोलिनसक्नुको भीडभाड रहेको चन्द्रागिरिमा यस पटक भने कोरोनाको कहरले यहाँ जान नपाएको गुनासो गर्ने हजारौँ भक्तालू भए ।
केही समय अघि लकडाउन खुकुलो हुदै जाँदा पशुपतिनाथ मन्दिर, भालेश्वर मन्दिर चन्द्रागिरी खुल्ला भन्ने आशा धेरैमा थियो । सरकारले तोकेको सुरक्षा मापदण्डहरु पुरा गरेर भक्तजन र भगवानको दुरी घटाउने उपायहरु पनि तयार भएका थिए । पशुपति नाथमा व्यापक सरसफाई गरिएको थियो । नेपालको एक प्रसिद्ध सफाई कम्पनी खेम्स क्लिनिंगले पशुपतिको सरसफाईको प्रोटोकल तयार पारेर काम थालिसकेको थियो । यसअघि नै साउनको सोमबारका लागि तयार पारिएको सो सफाई अभियानसँगै दर्शनार्थीले पशुपति टेक्न पाएका छैनन् ।
उता चन्द्रागिरिको हालत पनि यस्तै भयो । केवलकार चढ्ने, भालेश्वरको दर्शनका लागि जाने र माथि रिसोर्टमा बस्ने सबैका लागि छुट्टाछुट्टै सफाई प्रोटोकल तयार पारेर लागू गर्ने तयारीमा चन्द्रागिरि हिल्स लिमिटेड थियो । उक्त लिमिटेडका महाप्रबन्धक अभिशेक विक्रम शाहले सम्पूर्ण मापदण्डबमोजिमको सफाईका लागि कर्मचारीहरुलाई तालिम दिइएको थियो र आउने यात्रुहरुका लागि पनि प्रोटोकल तयार पारिएको थियो । भदौ १ गतेदेखि खुल्ने तयारी गरिरहेकोमा पछिल्लो लकडाउनका कारण सबैतिर बन्द नै भयो ।
सरकारले पर्यटन क्षेत्र तथा मन्दिरहरु खोल्ने तयारी गर्दागर्दै फेरि कोरोनाको संक्रमण आगो झैँ फैलँदै गएपछि ती सबै योजनाहरु कार्यान्वयन हुन सकेनन् । जसका कारण यस पटकको तीजमा नेपालका सबै नारीहरुले महादेवलाई जो जँहा रहे त्यहीँ बसेर सम्झिए ।
