काठमाडाैंः केही दिनयता अनपेक्षित रूपमा स्थिर रहेको सत्तारुढ दल नेकपा भित्रको राजनीति सोमबार साँझ एकाएक तरंगित बन्यो । अर्थ तथा सञ्चारमन्त्री डा युवराज खतिवडाको कार्यकाल सकिनै लाग्दा फेरि उहाँ नै दोहोरिन लागेको आशंका बढ्दै गएपछि नेकपाका उपाध्यक्ष बामदेव गौतमले एकाएक फायर खोल्नुभएकाे छ ।
२०७६ चैतमा नै गौतमलाई राष्ट्रियसभामा लैजाने निर्णय गरेको नेकपाको सचिवालयको निर्णय हालसम्म पनि कार्यान्वयन भएको छैन । डा खतिवडाको मोहमा पर्नुभएका प्रधानमन्त्री तथा अध्यक्ष केपी शर्मा ओलीले सचिवालयको निर्णय कार्यान्वयन नगर्दा अनेक शंका आशंका जन्मिएका छन् ।
पटक पटक अप्ठ्यारोमा परेका बेला अन्तिम अवस्थामा प्रधानमन्त्री एवं अध्यक्ष ओलीलाई साथ दिएर सत्ताको त्राण भरिदिने गरेका गौतमको राष्ट्रियसभा प्रवेशको निर्णय कार्यान्वयन नहुनु भने आश्चर्यको विषय बनेको छ । पटक पटक नेतृत्वबाट धोका पाएका गौतम यस पटक भने धाेका नपाइने पूर्ण विश्वासमा हुनुहुन्छ ।
कुनै भवितव्य नभए आउँदो भदाै १८ गते बस्ने सचिवालयको बैठकले बामदेव गौतमलाई राष्ट्रियसभामा रिक्त एक पदमा पठाउने निर्णय गर्नेछ । एक सचिवालय सदस्यका अनुसार गौतमलाई राष्ट्रियसभामा लैजाने निर्णय कार्यान्वयन गर्नुको विकल्प अध्यक्ष ओलीसँग छैन । यदि यो निर्णय कार्यान्वयन नभए फेरि नेकपाभित्र राजनीतिक जोड घटाउको खेल सुरु हुनेछ ।
साउन महिनामा सत्ता जोगाउन निकै अप्ठ्यारो अवस्थामा पुग्नु भएका प्रधानमन्त्री ओलीलाई गौतमको ६ बुँदे प्रस्तावले ठूलो राहत दिएको थियो । निराशाका बीच गौतमको प्रस्तावले केही आशा जगाएपछि सोही साँझ प्रधानमन्त्री ओली परिवार सहित गौतम निवास भैंसेपाटी पुग्नु भएको थियो । पछि त्यही छ बुँदेलाई आधार मानेर पार्टी अघि बढाउने सहमति गर्दै महासचिव विष्णु पौडेलको संयोजकत्वमा ६ सदस्यीय कार्यदल गठन गरिएको थियो भने कार्यदलले आफ्नो प्रतिवेदन पनि बुझाइसकेको छ ।
कार्यदलको प्रतिवेदन बारे छलफल गर्न भन्दै १३ गते बोलाइएको बैठक कोरोना संक्रमणका कारण १८ गते सम्मका लागि स्थगित भएको छ । भाद्र २० गते अर्थमन्त्री खतिवडाको पदावधि सकिने भएका कारण १८ गते बस्ने सचिवालयको बैठकले राष्ट्रिय सभामा राष्ट्रपतिबाट मनाेनीत गर्ने सदस्यका बारेमा निर्णय गर्नुपर्ने बाध्यात्मक अवस्था पनि रहेको छ ।
