काठमाडौँ । नेकपा एमाले सांसद सोनाम गेल्जेन शेर्पाले अध्यादेश संवैधानिक भएकाले अस्वीकार गर्नुको कुनै कारण नरहेको बताउनुभएको छ ।
आईतवारको राष्ट्रिय सभा बैठकमा बोल्दै उहाँले यस्तो बताउनुभएको हो । उहाँले अध्यादेश संवैधानिक व्यवस्था भएकाले सबैले स्वीकार गर्नुपर्ने बताउनु भयो ।
उहाँले आफूलाई पायक पर्दा स्वीकार्ने, पायक नपर्दा अस्वीकार गर्ने प्रवृत्तिलाई निरुत्साहित गर्न जरुरी रहेको बताउनु भयो । विगतमा अध्यादेश आफ्नो स्वार्थका लागि आएको भन्दै अहिले स्वार्थ केन्द्रित अध्यादेश नभएको बताउनु भयो । उहाँले जनताको हितमा, लगानीमैत्री वातावरण बनाउन, सुव्यवस्थित समाज निर्माणका लागि अध्यादेश ल्याइएको बताउनु भयो ।
उहाँले भन्नुभयो, ‘अध्यादेश संवैधानिक व्यवस्था हो । संवैधानिक व्यवस्था सबैले स्वीकार्नुपर्छ । हामी संवैधानिक व्यवस्थालाई स्वीकार्ने अधिकार लिने तर आफूलाई पायक पर्दा स्वीकार्ने, पायक नपर्दा अस्वीकार गर्ने जुन किसिमको हाम्रो प्रवृत्ति छ, त्यसलाई निरुत्साहित गर्नुपर्छ । अध्यादेश विगतमा पनि आएका थिए । तर विगतमा आफ्नो स्वार्थका लागि अध्यादेश ल्याइएको थियो । जस्तो पार्टी फुटाउने । पार्टी फुटाइसकेपछि, आफ्नो स्वार्थ पूरा भइसकेपछि फेरि अध्यादेश निष्क्रिय बनाउने गरिएको थियो । तर वर्तमान सरकारले अध्यादेश जनताको हितमा ल्याएको छ, लगानीमैत्री बनाउन, सुव्यवस्थित समाज निर्माणका लागि ल्याएको छ ।’
उहाँले द्रुत गतिमा संसदमा काम गर्न नसके देशलाई अग्रगति दिन नसकिने बताउनु भयो ।
