काठमाडौं । नेकपा एमालेका महासचिव शंकर पोखरेलले सामाजिक सञ्जाल नियमन विधेयकमा विपक्षी दलका नेताहरूले देखाएको दोहरो चरित्रप्रति कडा असहमति जनाउनु भएको छ ।
महासचिव पोखरेलले आफैं सहभागी भएर अन्तिम रुप दिइएको विधेयकको विरोध गर्नु अनैतिक कामको संज्ञा दिनुभएको छ ।
सामाजिक सञ्जालमार्फत महासचिव पोखरेलले भन्नुभएको छ, ‘विगतमा आफैले विधेयक मस्यौदा गर्न लगाएका र त्यसका वारेमा आफ्नो मत वाहिर ल्याएका दलहरुले नै विरोध गर्नु अनैतिक कार्य हो ।’
यस्तो छ महासचिव पोखरेलको भनाई:
यतिवेलाको चासो र चिन्ता
विधेयक दर्ता भएको छ नियमनका लागि । दुरुपयोग र साईवर अपराध रोक्नका लागि । विरोध सुरुभएको छ प्रेश तथा अभिव्यक्ति स्वतन्त्रताका नाममा । सरकारले न प्रेश तथा अभिव्यक्ति स्वतन्त्रतामा अंकुश लगाउन खोजेको छ । नत त्यसो गर्न संविधानले अनुमति नै दिन्छ । न संसदले नै त्यो काम गर्नेछ ।
सोसल मिडियाको नियमन आवश्यक छ । विधेयक त्यसका लागि नै खाएको छ । विधेयक मुलतः प्लेट फर्मको दर्ताको आवश्यकता र दुरुपयोग र त्यस मार्फ़त हुने अपराध नियन्त्रण गर्ने कुरासंग सम्वन्धित छ । साईवर क्राइम सामाजिक संजालको प्रयोगरी गरिने विश्वव्यापी रुपमा स्विकार गरिएको गम्भीर प्रकृतिको अपराध हो । त्यसको नियन्त्रण आवश्यक मात्र होइन अपरिहार्य विषय हो । नेपालको क़ानून त्यस मामिलामा कमजोर भएका कारणले त्यस प्रकृतिका अपराध वढेको तथ्यप्रति आखा चिम्लन मिल्दैन ।
त्यसमाथि विगतमा आफैले विधेयक मस्यौदा गर्न लगाएका र त्यसका वारेमा आफ्नो मत वाहिर ल्याएका दलहरुले नै विरोध गर्नु अनैतिक कार्य हो । यस्ता कुरा प्रति नागरिकहरु समेत सचेत हुनु पर्दछ । अराजकता र अपराधको नियन्त्रण आम नागरिकको चासो र सरोकारको विषय हो र हुनु पर्दछ ।
