काठमाडौँ । इंग्लिस प्रिमियर लिग फुटबलमा शीर्षस्थानको लिभरपुलले सहज जित निकालेको छ । गएराति भएको खेलमा लिभरपुलले इप्सविच टाउनलाई ४–१ गोलले हराएको हो ।
घरेलु मैदान एनफिल्डमा लिभरपुललाई जित दिलाउन कोडी गाक्पोले दुई तथा डोमिनिक सोबोज्लाइ र मोहम्मद सलाहले एक–एक गोल गरे । इप्सविचका जाकोव ग्रिभ्सले एक गोल फर्काए ।
जितसँगै शीर्षस्थानको लिभरपुलको २२ खेलबाट ५३ अंक छ । इप्सविच १६ अंकका साथ १८ औं स्थानमा छ ।
यस्तै, गएराति नै भएको अर्को खेलमा बर्नमाउथले नटिङहमलाई ५–० गोलले हरायो । घरेलु टोलिको जितमा डाङ्गो ओउटाराले ह्याट्रिक गरे भने जस्टिन क्लिभर्ट र एन्टोनि सेमेन्योले एक–एक गोल गरे ।
खेलको नवौं मिनेटमा नै क्लिभर्टको गोलबाट बर्नमाउथले सुरुवाती अग्रता लिएको थियो । त्यसपछि ५५,६१ र ८७ औं मिनेटमा गोल गर्दै ओउटाराले ह्याट्रिक गरे ।
यस्तै, खेलको इन्जुरी समयमा सेमेन्योले गोल थप्दै बर्नमाउथलाई ५–० को जित दिलाए ।
यो नतिजापछि बर्नमाउथ २३ खेलबाट ४० अंकका साथ तालिकाको सातौं स्थानमा रहेको छ । नटिङहम ४४ अंकका साथ तेस्रो स्थानमा छ ।
यस्तै, गएराति नै भएको अर्को खेलमा आर्सनलले वल्भ्सलाई १–० गोलले हरायो । पाहुना टोलि आर्सनललाई जित दिलाउन एकमात्र गोल रिकार्डो कालाफिओरीले गरे ।
उनले खेलको ७४ औं मिनेटमा गोल गरेका हुन् । खेलको ४३ औं मिनेटमा लेविस स्केलीले रातो कार्ड खाएपछि आर्सनल १० खेलाडीमा समेटिएको थियो ।
यता, ७० औं मिनेटमा वल्भ्सका जोआओ गोमेजले पनि रातो कार्ड खाँदै मैदानबाट बाहिरिए ।
जितसँगै २३ खेलबाट ४७ अंक जोडेको आर्सनल अंकतालिकाको दोस्रो स्थानमा छ । वल्भ्स १६ अंकका साथ १७ औं स्थानमा छ ।
