काठमाडौं । प्रेस चौतारी नेपालका अध्यक्ष गणेश बस्नेले पत्रकारहरूले नागरिकको चेतना र भावनाको सम्मान गर्न सक्नु पर्ने बताउनुभएको छ ।
प्रेस चौतारी नेपाल झापाको १० औँ जिल्ला अधिवेशनलाई शुक्रबार सम्बोधन गर्दै अध्यक्ष बस्नेतले प्रेस चौतारी नेपालका पत्रकारहरूको संसारको सबैभन्दा अग्लो चुचुरो सगरमाथाको सिरबाट तल हेर्ने र नेपालको सबैभन्दा होचो भाग केचनाबाट माथि उठ्ने साहस हुनुपर्ने बताउनुभयो ।
इमानदारीताका साथ मेहनत गर्दा र संगठनलाई घात नगरी काम गर्दा सबैले अवसर पाउनेमा उहाँले जोड दिनुभयो । तथापि मलाई यही पद चाहिन्छ भन्ने कुरा भने गलत भएको बस्नेतले प्रष्ट पार्नुभयो ।
नेपालको वर्तमान संविधान जारी गर्न झाबाट निर्वाचित वर्तमान प्रधानमन्त्री केपी शर्मा ओलीको महत्त्वपूर्ण योगदान भएको बताउँदै बस्नेतले आज तिनै ओली माथि चौतर्फी आक्रमण भइरहेको बताउनुभयो ।
राष्ट्रियताको झण्डा उठाए बापत र मुलुकको लागि संविधान जारी गरेबापत आज ओली माथि आक्रमण भइरहेको उहाँले बताउनुभयो । आज मुलुक बन्ने भयो र आफ्नो खेती बन्द हुने भयो भनेर आत्तिएकाहरू वर्तमान प्रधानमन्त्री विरुद्ध लागेका बस्नेतको भनाई छ । ‘नयाँका नाममा पनि त्यही खेती छ, पुरानाका नाममा पनि त्यही खेती सुरु भएको छ’, उहाँले भन्नुभयो ।
बस्नेतले अहिले देश र सरकार माथि सामाजिक सञ्जाल मार्फत आक्रमण भइरहेको उहाँले बताउनुभयो । यसलाई चिर्न मेचीदेखि महाकालीसम्मका प्रेस चौतारी आबद्ध पत्रकारलाई लाग्न उहाँले आग्रह गर्नुभयो । ‘सामाजिक सञ्जाल माथि राष्ट्र र राष्ट्रियता माथि भइरहेको आक्रमण प्रेस चौतारी नेपालले चिर्न सक्छ’, उहाँले भन्नुभयो ।
