काठमाडौं। नेपाली कांग्रेसका सभापति शेरबहादुर देउवाले नेपाललाई फाइदा हुने क्षेत्रमा वैदेशिक सहयोग लिन सकिने बताएका छन्।
कांग्रेसको आर्थिक नीति तथा योजना विभागले बुधबार सानेपामा गरेको ‘नेपालमा वैदेशिक सहयोगको अर्थ राजनीति’ विषयक कार्यक्रममा सभापति देउवाले यस्तो बताएका हुन्।
उनले वैदेशिक सहयोगका बिषयमा बेला–बेला विरोध हुने गरेको भन्दै मुलुकको हितमा लिन सकिने बताएका हुन् । उनले विभिन्न निकायले नेपाललाई अनुदान दिने गरेको बताउँदै केही ऋणसमेत अनुदानमा परिणत हुने धारण राखे ।
उनले विभिन्न निकायले नेपाललाई अनुदान दिने गरेको र केही ऋण समेत अनुदानमा परिणत हुने गरेको धारण राखे । एमसीसी पास गर्ने बेलामा ठुलो विरोध भए पनि अहिले राम्रो रहेछ भन्ने सबैले बुझ्दै गएको उनले बताए ।
सभापति देउवाले नेपाल भारत र चीनको बिचमा रहेकाले त्यहाँको नीतिको असर पर्नु स्वाभाविक रहेको र त्यसले फाइदा र बेफाइदा दुवै हुने गरेको धारणा राखे । उनले ऋण लिए पनि कसैको डेब्ट–ट्रयापमा पर्न नहुनेतर्फ सचेत गराए । ‘कसैसँग ऋण लिँदा ऋणको पासोमा नपरोस् भन्नु राम्रै कुरा हो’, उनले भने, ‘हाम्रो स्वार्थ हेरेर ऋण लिऊँ । वश, हामी डेब्ट–ट्रयापमा पर्नु भएन ।’
तस्बिर : माधवप्रसाद घिमिरे/रासस
