काठमाडौँ । च्याम्पियन्स लिग फुटबलमा स्पेनिस क्लब एट्लेटिको मड्रिडले जित निकालेको छ ।
गएराति भएको खेलमा एट्लेटिकोले जर्मन क्लब बायर लेभरकुसेनलाई २–१ गोलले हराएको हो । घरेलु टोलिको जितमा दुबै गोल युलियन अल्भारेजले गरे ।
खेलको २५ औं मिनेटमा पाब्लो बारिओसले रातो कार्ड खाएपछि एट्लेटिको १० खेलाडीमा समेटिएको थियो ।
पहिलो हाफको इन्जुरी समयमा पिएरो हिन्कापीले गोल गर्दै लेभरकुसेनलाई सुरुवाती अग्रता दिलाएका थिए ।
यता, ५२ औं र ९० औं मिनेटमा अल्भारेजले गोल गर्दै एट्लेटिकोलाई महत्वपूर्ण जित दिलाए । ७६ औं मिनेटमा लेभरकुसेनका गोलस्कोरर पिएरो रातो कार्ड खाँदै बाहिरिएका थिए ।
एट्लेटिको ७ खेलबाट १५ अंकसहित तालिकाको तेस्रो स्थानमा रहँदा १३ अंक जोडेको लेभरकुसेन छैटौं स्थानमा छ ।
