एजेन्सी । टिभी अभिनेता करण वीर मेहरा ‘बिग बोस–१८’ को विजेता बनेका छन् । करणले बिग बोस ट्रफीसँगै ५० लाख नगद पनि पाएका छन् । गत वर्ष नै करणले ‘खतरों के खिलाडी–१४’ को उपाधि पनि जितेका थिए ।
दिल्लीमा जन्मेका करणले टिभी शो, वेब सिरिज र फिल्ममा काम गरेका छन् । २००५ मा सुरु भएको उनको अभिनय करियर अहिलेसम्म पनि जारी छ ।
तर, करणको व्यक्तिगत जीवन उथलपुथलले भरिएको थियो । दुई पटक विवाह गरिसकेका करण अहिले अविवाहित छन् । करणको सन् २००६ मा भयानक दुर्घटना भएको थियो । यही क्रममा उनी रक्सीको लतमा परे र डिप्रेसनमा समेत गए ।
करणको जन्म २८ डिसेम्बर १९७७ मा दिल्लीमा भएको थियो । हजुरआमाको सल्लाहमा उनले आफ्नो नाममा दिवंगत हजुरबुवाको नाम वीर राखेका थिए ।
करणले मसुरीको बोर्डिङ स्कुलमा १० कक्षासम्म पढेका थिए । त्यसपछि उनले दिल्लीको एक विद्यालयमा आफ्नो थप अध्ययन गरे । स्कुलको पढाइ पूरा गरेपछि उनले दिल्ली कलेज अफ आर्ट्स एण्ड कमर्सबाट स्नातक गरे ।
करणले सन् २००९ मा बाल्यकालकी प्रेमिका देविका मेहरासँग विवाह गरेका थिए । तर, सन् २०१८ मा दुवैको सम्बन्धविच्छेद भयो ।
देविकासँग सम्बन्धविच्छेद गरेपछि करणले २०२१ मा निधि सेठसँग विवाह गरे । तर उनीहरुको सम्बन्ध पनि लामो समय टिक्न सकेन र २०२३ मा उनीहरु अलग भए ।
