काठमाडौं । जय ट्रफी एलिट कप अन्तर्गत समूह चरणको पाँचौं खेलमा मधेश प्रदेशलाई ८ विकेटले हराउँदै त्रिभुवन आर्मी क्लब फाईनल पुगेको छ ।
मधेशले दिएको २८ रनको झिनो लक्ष्यलाई आर्मीले २ विकेट क्षतिमा पुरा गर्दै फाईनल पुग्ने पहिला टोली बनेको हो ।
आर्मीको लागि त्रितराज दासले १३ रन बनाए । सन्तोष कार्कीले चार रन बनाउदा ओपनर इमरान सेखले आठ र बसिर अहमदले चार रन जोडे ।
यसअघि पहिलो इनिङमा आर्मीले ९ विकेट क्षतिमा २२५ रन बनाएको थियो भने मधेश १०२ रनमा समेटिएको थियो । १२३ रनले पछि परेको मधेशले आज दोस्रो इनिङमा १५० रन मात्रै जोड्न सक्यो ।
यससँगै, मधेश प्रदेश प्रतियोगिताबाट बाहिरिएको छ । फाइनलमा स्थान बनाउँने दोस्रो टोली भने जनकपुरमा जारी पुलिस र बागमतीको खेल पश्चात थाहा हुनेछ ।
