एजेन्सी । अभिनेता रवि किशन शुक्ला बलिउडको कल्ट क्लासिक फिल्म ग्याङ्ग्स अफ वासेपुरको हिस्सा बन्न सक्दथे । तर एक शौखका कारण उनीबाट यो फिल्म खोसियो ।
वास्तवमा रवि किशनलाई दूधले नुहाउने बानी थियो । फिल्म निर्देशक अनुराग कश्यपले उनको यस्तो खर्च वहन गर्न नसक्ने बताए ।
साथै, केही व्यक्तिले अनुरागलाई अभिनेताविरुद्ध उक्साएका थिए, जसका कारण उनीबाट फिल्म खोसिएको थियो ।
युट्युबर शुभंकर मिश्रालाई दिएको अन्तर्वार्तामा रवि किशनले आफूलाई फिल्म अफर गरिएको तर भूमिकाको बारेमा कुनै जानकारी नपाएको बताए ।
उनले थप भने– ‘म दूधले नुहाउने गर्थे । मलाई रमाइलो लाग्थ्यो । यो कुरा अनुराग कश्यपलाई कसैले बताए । म पागल हुँ, त्यसैले म कलाकार हुँ । म सामान्य मान्छे भए अफिसमा काम गर्छु र टिफिन लिएर काममा जान्छु । मेरो मागअनुसार बजेट नभएकाले फिल्म गुमाउनुपर्यो । कसैले मेरो बारेमा अरु हल्ला पनि फैलाए । त्यो फिल्ममा काम गर्ने सबै आक्रोशित थिए ।’
रवि किशनले आफ्नो शौखको बारेमा कुरा गरेको यो पहिलो पटक भने होइन । केही समयअघि उनले आपको अदालतमा भनेका थिए– ‘म दूधले नुहाएर गुलाबको फूलमा सुत्ने गर्थे । मलाई लाग्यो कि म एक अभिनेता हुँ र यो सबै महत्त्वपूर्ण छ । मलाई लाग्थ्यो दूधले नुहाउने हो भने दुधले नुहाउँछ भन्ने चर्चा हुन्छ ।’
अनुराग कश्यप र रवि किशनले फिल्म मुक्काबाजमा सँगै काम गरेका थिए । तर, अनुराग कश्यपको बयानका कारण दुवैबीच विवाद सुरु भयो ।
