एजेन्सी । दक्षिण कोरियाको मुआन विमानस्थलमा जेजु एयरको विमान दुर्घटना भएको छ ।
समाचार एजेन्सी एपीका अनुसार विमानमा १७५ यात्रु र ६ चालक दलका सदस्यसहित १८१ जना सवार थिए । १७७ शव बरामद भएको छ ।
दुई जनाको उद्धार टोलीले जिउँदै उद्धार गरेको छ । बाँकी दुई यात्रुको पनि मृत्यु भएको आशंका गरिएको छ । मृत्यु हुनेमा ८२ पुरुष र ८४ महिला रहेका छन् । ११ शवको अझै सनाखत हुन सकेको छैन ।
दुर्घटना नेपाली समय अनुसार आइतबार बिहान ५ः५२ मा (स्थानीय समय अनुसार ९ः०७)मा भएको थियो । बैंककबाट आएको विमान विमानस्थलमा अवतरण गर्न लागेको थियो तर ल्यान्डिङ गियरमा खराबीका कारण विमानको पाङ्ग्रा खुलेनन् ।
आपतकालीन अवस्थामा विमानको बेली ल्यान्डिङ गरिएको थियो । यसमा विमानको शरीर सिधै रनवेमा ठोक्किन्छ । यसै क्रममा विमान धावनमार्गमा चिप्लिएर विमानस्थलको बाउन्ड्री पर्खालमा ठोक्किएको थियो । विस्फोटसँगै आगो लागेको थियो ।
यहाँ रोयटर्सले रिपोर्ट गरेको छ कि दुर्घटना हुनु अघि मुआन एयरपोर्टको एयर ट्राफिक कन्ट्रोलर (एटीसी)बाट विमानसँग चरा ठोक्किएको बारे अलर्ट पठाइएको थियो । यो पनि विमानको ल्यान्डिङ गियरमा खराबीको कारण हुन सक्छ ।
दुर्घटना भएको जेजु एयरलाइन्सको विमान अमेरिकी कम्पनी बोइङको ७३७–८०० नम्बरको विमान थियो । विमानले दुई पटक विमानस्थलमा अवतरण गर्ने प्रयास गरेको थियो । ल्यान्डिङ गियर नखुलेपछि पहिलो पटक विमान अवतरण हुन सकेन । त्यसपछि विमानले विमानस्थलको परिक्रमा गरेको थियो ।
दोस्रो पटक, पाइलटले ल्यान्डिङ गियर बिना नै विमानलाई बेली ल्यान्ड गर्ने निर्णय गरे । धेरै मिडिया रिपोर्टका अनुसार चरा विमानको पखेटामा ठोक्किएको दाबी गरिएको छ । जसका कारण ल्यान्डिङ गियर बिग्रियो र अवतरण गर्दा खुल्न सकेन ।
मुआन एयरपोर्टका फायर अफिसरले समाचार एजेन्सी रोयटर्ससँग कुरा गर्दै विमानमा लागेको आगो नियन्त्रणमा आएको बताए । तर, आगो निभाउन ४३ मिनेट लागेको थियो ।
अधिकांश यात्रु विमानको पछाडिको भागमा थिए । विमानमा सवार यात्रुमध्ये १ सय ७३ दक्षिण कोरियाली र २ थाई नागरिक थिए । मिडिया रिपोर्टका अनुसार बाँचेका दुबै चालक दलका सदस्य हुन् ।
