काठमाडौं । सहरी विकास राज्यमन्त्री रामवीर मानन्धरले नागरिकको मुहारमा खुसी र जीवनयापन सहज बनाउन सरकारले काम गरिरहेको बताउनुभएको छ । सोमबार विश्व बसोवास दिवसको शुभकामना दिंदै मन्त्री मान्धरले जनताको जीवनस्तर सुधारका लागि सरकारले निरन्तर प्रयास गरिरहेको बताउनुभएको हो ।
आवासबिहीन नागरिकलाई छानोमुनी ल्याउने कार्य भइरहेको बताउँदै मन्त्री मानन्धरले आगामी तीन वर्षभित्र मुलुकबाट फुस र खरका छाना विस्थापित गरिने बताउनुभयो । चालु आर्थिक वर्षमा ७५३ वटै पालिकामा कम्तिमा एक लाख परिवारको घरमा आधुनिक छानोको प्रवन्ध हुने बताउँदै मन्त्री मानन्धरले तीन वर्षभित्र सबै फुसका छाना विस्थापन हुने दाबी गर्नुभयो ।
प्रधानमन्त्री केपी शर्मा ओलीको नेतृत्वमा जनताको समृद्धिको सपना पुरा हुने बताउँदै मन्त्री मानन्धरले बेसाहरा नागरिकको संरक्षण गर्ने दायीत्व राज्यले पुरा गर्ने बताउनुभयो । बिपन्न नागरिकलाई सुरक्षित आवास दिलाउन सरकार लागिपरेको बताउँदै मन्त्री मानन्धरले आवासको अधिकार सम्बन्धी ऐन कार्यान्वयनमा रहेको बताउनुभयो ।
करिब ६० प्रतिशत जनता शहरी क्षेत्रमा बसोबास गरिरहेको बताउँदै मन्त्री मानन्धरले सबैका लागि आवास समृद्ध शहरी विकासको नारालाई यथार्थमा परिणत गरिने बताउनुभएको छ । मन्त्री मानन्धरले सहरी क्षेत्रलाई थप व्यवस्थीत बनाउनका लागि राज्यले आवश्यक प्रवन्ध मिलाएको दाबी समेत गर्नुभयो ।
कोरोना संक्रमणका कारण विकासमा केही बाधा देखिएको बताउँदै मन्त्री मानन्धरले अब कोरोनाबाट जोगिंदै मुलुकलाई समृद्धिको बाटोतर्फ अघि बढाइने बताउनुभयो । महामारीको जोखिमबीच पनि सरकारले जनताको पक्षमा दिर्घकालिन विकासका काम गरिरहेको बताउँदै मन्त्री मानन्धरले सरकारका जनपक्षिय कामको पनि विपक्षीहरुले विरोध गरिरहेकोमा आश्चर्य व्यक्त गर्नुभयो । मन्त्री मानन्धरले सरकारले जनताको चाहना अनुसार नै काम गरिरहेको बताउँदै विपक्षीहरुलाई पनि राम्रा काममा साथ दिन र देश विकासमा हातेमालो गर्न आह्वान गर्नुभएको छ ।
