एजेन्सी । गायक तथा अभिनेता दिलजीत दोसांझ यतिबेला आफ्नो सांगीतिक यात्रा दिल लुमिनाटीका कारण चर्चामा छन् ।
हालै उनले चण्डीगढमा प्रस्तुति दिएका थिए । शोको क्रममा एउटा भिडियो सामाजिक सञ्जालमा भाइरल भइरहेको छ, जसमा उनले अब भारतमा कन्सर्ट नगर्ने बताएका छन् ।
दिलजीतले भारत सरकारले भारतमा कन्सर्टको पूर्वाधार नबनाउँदासम्म भारतमा कन्सर्ट नगर्ने बताएका छन् । कन्सर्टका क्रममा उनले देशको कमजोर पूर्वाधारप्रति निराशा व्यक्त गरे ।
दिलजीत दोसांझको शोमा मानिसहरुको ठूलो भीड जम्मा हुन्छ, जसका कारण धेरै पटक मानिसहरु दुर्घटनाको शिकार बन्छन् । दिलजीतले भने–‘हामीलाई त्रास दिनुको सट्टा हामीले स्थान र व्यवस्थापन तय गर्नुपर्छ ।’
‘म सम्बन्धित अधिकारीहरूलाई बताउन चाहन्छु कि भारतमा लाइभ शोको लागि पूर्वाधार छैन । यो ठूलो कमाइको स्रोत हो, धेरै मानिसहरूले काम पाउँछन् र यहाँ काम गर्न सक्षम छन् ।’ दिलजीतले आफ्नो सेट लाइभ शो अनुसार डिजाइन नभएको बताउँछन् ।
दिलजीत आफ्नो सेट केन्द्रमा हुन चाहन्छन् र उनका फ्यानहरू उनको वरिपरि हुन चाहन्छन् । यो नभएसम्म उनले भारतमा कन्सर्ट गर्ने छैनन् ।
