काठमाडौं । रोल्पामा निर्माणाधीन झोलुङ्गे पुलको पर्खाल निर्माणको क्रममा माटोको ढिस्कोले पुरिएर चार जना कामदारको मृत्यु भएको छ ।
आज बिहान ९ः५० बजे सुनछहरी गाउँपालिका वडा नम्बर ३ बाहिरी गाममा पर्खाल लगाउने क्रममा माटोको ढिस्को खसेर पुरिँदा चार जनाको मृत्यु भएको जिल्ला प्रहरी कार्यालय रोल्पाले जनाएको छ ।
मृत्यु हुनेमा सोही ठाउँका ४५ वर्षीय दुजमन परियार, ३१ वर्षीय ओम परियार, ४० वर्षीया सुबित्रा परियार र २७ वर्षीया आईती परियार रहेका छन् ।
पर्खाल लगाउने क्रममा माटोको ढिस्को खसेर पुरिँदा पाँच जना पुरिएका थिए । पुरिएका भनिएका अर्का एक जनाको खोजी भइरहेको प्रहरीले जनाएको छ । माटोको ढिस्को खस्दै गर्दा दुई जना भने भाग्न सफल भएका थिए ।
मौलाबाङ र बाहिरी गाम जोड्ने झोलुङ्गे पुल निर्माणका लागि एलबी एण्ड पल्लभी जक्सन जेभी निर्माण सेवाले जिम्मा लिएको थियो ।
