काठमाडौँ । सिनामंगलस्थित होटेल जन्मभूमिमा आईतबार मृतावस्थामा भेटिएका रमेश माझी र शर्मिला माझीको शव परिवारले बुझेका छन् । त्रिवि शिक्षण अस्पतालमा पोस्टमार्टम पछि परिवारले शव बुझेका हुन् ।
सुनसरीको दुहबी घर भएका माझी दम्पती मंसिर ८ गते बिहान कतार एयरलाइन्सको उडानमार्फत क्यानडाबाट काठमाडौँ आएका थिए । क्यानडाबाट उनीहरू नेपाल आएको बारे परिवार बेखबर रहेको अनुसन्धानमा संलग्न एक अधिकारीले बताए । प्रहरीसँग परिवारका सदस्यहरूले भनेका छन्, ‘उनीहरू नेपाल आउनेबारे थाहै थिएन ।’
सुनसरीबाट काठमाडौँ आएर मृतकका परिवारले घटनाबारे अनुसन्धानका लागि प्रहरी वृत्त गौशालामा जाहेरी दिएका छन् ।
उनीहरु काठमाडौँ आएपछि विमानस्थलबाट सिधै होटेलमा गएर बसेको पाईएको जिल्ला प्रहरी परिसर काठमाडौँका एसपी नवराज अधिकारीले बताए । क्यानडाबाट परिवारलाई खबर नै नगरी आएका दम्पतीले आत्महत्या गर्नुको कारणबारे अनुसन्धान भईरहेको उनले बताए ।
माझी दम्पती होटलको बरण्डाको रेलिङमा कपडाको पासो लगाएर झुण्डिएको अवस्थामा मृत फेला परेका थिए । शव परीक्षणको रिपोर्ट आएपछि अनुसन्धानमा केहि सहयोग मिल्ने एसपी अधिकारीले बताए ।
