काठमाडौं। घरेलु हिंसा पीडित बिनु यादवले सर्वोच्च अदालतको साईनबोर्डमा कालो रङ्ग छ्यापेर विरोध जनाउनु भएको छ । रङ्ग छ्यापे लगत्तै प्रहरीले उहाँलाई नियन्त्रणमा लिएको छ ।
यादबलाई हाल प्रहरी वृत्त, सिंहदरबारको हिरासतमा राखिएको छ । सिरहाको सिरहा नगरपालिका–२, स्थायी घर भएकी ३० वर्षीया विनु लामो समयदेखि न्यायका लागि आन्दोलन गरिरहनु भएको छ ।
रामेछापको गोठगाउँका प्रदीप कठायतसँग प्रेम विवाह गर्नुभएकी बिनुले आफूमाथि घरेलु हिंसा भएको आरोप लगाउँदै आउनु भएको छ ।यादबले घरेलु हिंसा भएको भन्दै प्रदीपविरुद्ध रामेछाप जिल्ला अदालतमा जबरजस्ती करणी उद्योगको मुद्दा दायर गरेको र अदालतले प्रदीपलाई सफाइ दिनुसँगै सम्बन्धविच्छेद पनि गरिदिएको थियो । सो फैसलापछि दोषीलाई उन्मुक्ति दिने न्यायाधीशलाई कारबाही गर्नुपर्ने माग सहित उहाँले प्रर्दशन गरिरहनु भएको छ ।
न्यायका लागि भन्दै यसअघि पनि उहाँले सर्वोच्चको गेटमा रातो रङ्ग छ्यापेर विरोध जनाउनु भएको थियो । न्यायको माग गर्दै यादब माइतीघर मण्डलामा आमरण अनशन पनि बस्नु भएको थियो ।
