एजेन्सी । भारत र दक्षिण अफ्रिकाबीचको चार खेलको टी–२० सिरिजको पहिलो खेल आज डर्बनमा हुँदैछ । खेल नेपाली समय अनुसार राति ८ः४५ बजे किंग्समीड क्रिकेट मैदानमा सुरु हुनेछ । टस राति ८ बजे हुनेछ ।
यस वर्षको जुनमा भएको टी–२० विश्वकपको फाइनलमा दक्षिण अफ्रिकालाई हराउँदै भारतीय टोली च्याम्पियन बनेको थियो । फाइनलपछि दक्षिण अफ्रिका र भारतीय टोली पहिलो पटक आमनेसामने हुँदैछन् ।
यी दुई टोलीबीच अहिलेसम्म २७ टी–२० खेल भएका छन् । जसमा भारतले १५ र दक्षिण अफ्रिकाले ११ जित हात पारेको छ । जबकि एक खेल अनिर्णित रह्यो ।
पछिल्लो पटक भारतले सन् २०२३ मा टी–२० सिरिजका लागि दक्षिण अफ्रिकाको भ्रमण गरेको थियो, जहाँ दुवै टोलीले १–१ को बराबरी खेलेका थिए भने एक खेल वर्षाका कारण रद्द भएको थियो ।
यी दुईबीच अहिलेसम्म ९ टी–२० सिरिज खेलिएको छ जसमा भारतले ४ र दक्षिण अफ्रिकाले २ जितेको छ । जबकि ३ सिरिज बराबरीमा रह्यो ।
भारतीय कप्तान सूर्यकुमार यादव यस वर्ष टी–२० मा टोलीका लागि सर्वाधिक रन बनाउने खेलाडी हुन् । उनले १४ खेलमा ४ सयभन्दा बढी रन बनाएका छन् । जसमा ४ अर्धशतक रहेका छन् । बलर अर्शदीप सिंहले सर्वाधिक विकेट लिएका छन् । उनले १४ खेलमा २८ विकेट लिएका छन् ।
दक्षिण अफ्रिकाका ओपनर रिजा हेन्ड्रिक्स यस वर्ष टोलीका सर्वाधिक रन बनाउने खेलाडी हुन् । हेन्ड्रिक्सले १७ खेलमा ३९९ रन बनाएका छन् । यो वर्ष टिमका लागि सर्वाधिक विकेट लिने बलर एनरिके नोर्ट्या हुन् । तर, उनी यो सिरिजमा टोलीमा छैनन् । यो अवस्थामा ओटनेल बार्टम्यान सर्वाधिक विकेट लिने खेलाडी हुन् । उनले १० खेलमा १४ विकेट लिएका छन् ।
दुबै टोलीको सम्भावित प्लेइङ–११
भारतः सूर्यकुमार यादव (कप्तान), सञ्जु सामसन, अभिषेक शर्मा, तिलक वर्मा, हार्दिक पाण्ड्या, रिंकु सिंह, रमनदीप सिंह, अक्षर पटेल, वरुण चक्रवर्तीररवि बिश्नोई, अर्शदीप सिंह र आवेश खान ।
दक्षिण अफ्रिकाः एडेन मार्कराम (कप्तान), रीजा हेन्ड्रिक्स, रायन रिकेल्टन, ट्रिस्टन स्टब्स, हेनरिक क्लासेन (विकेटकिपर), डेभिड मिलर, डोनोभान फरेरा, मार्को यान्सन, जेराल्ड कोएत्जी, ओटनेल बार्टम्यान र लुथो सिपामला ।
