काठमाडौँ । अमेरिकाका पूर्वराष्ट्रपति डोनाल्ड ट्रम्प उपराष्ट्रपति कमला ह्यारिसविरुद्ध मैदानमा उत्रिनुभएको छ । मङ्गलबार आठ राज्यमा मतदान सुरु भएसँगै अमेरिकामा चुनावी दिन सुरु भएको छ ।
सिएनएनका अनुसार कनेक्टिकट, न्युजर्सी, न्युयोर्क, न्युह्याम्पशायर र भर्जिनियासहित आठ राज्यमा मतदान केन्द्रहरू अहिले खुला छन् ।
इन्डियाना र केन्टकीमा मतदान पहिले नै सुरु भइसकेको छ र मध्य समय क्षेत्रका केही क्षेत्र नेपाली समयानुसार साँझ ५ः४५ बजे खुलेका छन् ।
मेनमा सबै मतदान स्थलहरू खुला छन् तर पाँच सयभन्दा कम जनसङ्ख्या भएका केही नगरपालिका नेपाली समयानुसार राति ८ः४५ बजे खुल्न सक्छन् ।
न्युह्याम्पशायर राज्यको डिक्सभिल नच टाउनशिपले दशकौँ लामो परम्परा अनुरूप मध्यरातमा (स्थानीय समय) मतदान गरेको छ । हाल ह्यारिस र ट्रम्प तीन–तीन मतमा बराबरीमा हुनुहुन्छ ।
अमेरिकी मतदाताहरू आफ्नो सबैभन्दा महत्त्वपूर्ण चुनावमा मतदान गर्न जाँदैछन् । मतदानले केवल अमेरिकाको मात्र नभई अबको चार वर्षसम्म विश्व भू–राजनीतिमा समेत प्रभाव पार्ने दिशा तय गर्नेछ ।
मतदान समय राज्यपिच्छे फरक हुनेछ तर धेरैजसो स्थानमा मङ्गलबार (स्थानीय समय) बिहान ६ बजेदेखि बेलुका ८ बजेसम्म मतदान हुनेछ । मतदान सुरु भएपछि एग्जिट पोल आउन थाले पनि सबै राज्यमा मतगणना सकिएपछि मात्र अन्तिम नतिजा आउनेछ ।
पहिलो मतदान जर्जियासहित छ राज्यमा पूर्वी समयअनुसार साँझ ७ बजे (नेपाली समयानुसार बिहान ५ः४५ बजे)मा बन्द हुनेछ । अन्तिम मतदान ब्लु स्टेट हवाई र रेड स्टेट अलास्कामा पूर्वी समयअनुसार बिहान १२ बजे (नेपाली समयानुसार बिहान १०ः४५ बजे) मा बन्द हुनेछ ।
कूल मतदान पूर्वी समयअनुसार दिउँसो १ बजे (नेपाली समयानुसार बिहान ११ः४५ बजे) सम्ममा बन्द हुनेछ । त्यसपछि मतगणना सुरु हुनेछ । साना राज्यहरूको नतिजा मतदान सकिएलगत्तै प्रक्षेपण गर्न सकिन्छ । केही प्रमुख युद्धभूमि राज्यमा विजेता प्रक्षेपण गर्न घन्टौँ लाग्न सक्छ ।
धेरै अन्य पार्टीको उपस्थिति भए पनि अमेरिकी दौड डेमोक्रेटिक र रिपब्लिकन पार्टीबीच छ । उपराष्ट्रपति कमला ह्यारिस पदासीन डेमोक्रेटकी उम्मेदवार हुनुहुन्छ र उहाँ अमेरिकाको पहिलो महिला राष्ट्रपति बनेर इतिहास रच्ने लक्ष्यमा हुनुहुन्छ । निर्वाचित भएमा उहाँ संयुक्त राज्य अमेरिकाको पहिलो भारतीय मूलको राष्ट्रपति पनि हुनुहुनेछ ।
अर्कोतर्फ रिपब्लिकन उम्मेदवार पूर्वराष्ट्रपति डोनाल्ड ट्रम्प हुनुहुन्छ । उहाँ सन् २०२० मा कटु बहिर्गमनपछि ह्वाइट हाउसमा ऐतिहासिक कमब्याक गर्ने लक्ष्यमा हुनुहुन्छ । विशेषगरी यदि ट्रम्पले जित्नुभयो भने यो एक सय वर्षभन्दा बढी समयमा ह्वाइट हाउसमा कुनै राष्ट्रपतिले दुई गैर–लगातार कार्यकाल सेवा गरेको पहिलो उदाहरण हुनेछ ।
धेरैजसो सर्वेक्षणले ट्रम्प र ह्यारिसबीच धेरै नजिकको दौड भविष्यवाणी गरेका छन् । सबै अग्रता त्रुटिको मार्जिनभित्र प्रक्षेपित छन् ।
एबिसी न्युजको ‘फाइभ थर्टी एट’ प्लेटफर्मले प्रदान गरेको राष्ट्रिय सर्वेक्षणअनुसार ह्यारिस (४८) ले डोनाल्ड ट्रम्प (४६.९) विरुद्ध १ प्रतिशत विन्दुको सामान्य अग्रता लिनुभएको छ ।
एनबिसी न्युज र एमर्सन कलेजले दुई उम्मेदवारबीच राष्ट्रियस्तरमा ४९५–४९५ को टाई प्रक्षेपण गरेका छन् । इप्सोसले ह्यारिसलाई तीन अङ्कको अग्रता (४९%–४६%) प्रक्षेपण गरेको छ भने एटलसइन्टेलले ट्रम्पलाई दुई अङ्कको अग्रता (५०%–४८%) प्रक्षेपण गरेको छ ।
