बेलायत । बेलायतका प्रधानमन्त्री बोरिस जोनसनले बेलायतमा दोस्रो पटक देश व्यापी लकडाउन घोषणा गरेका छन् । कोरोनाभाइरसको संक्रमण बढेसँगै राष्ट्रिय स्वास्थ्य सेवाका लागि ‘स्वास्थ्य र नैतिक विपत्’ रोक्न उनले देशभरी नै दोस्रो पटक लकडाउन गर्ने घोषणा गरेका हुन् ।
आउँदो डिसेम्बरमा सदाको झै क्रिसमस रहेको हुँदा त्यसबेला पनि मानिसहरुको अधिक मात्रामा भिड हुने भएकाले त्यसलाई नियन्त्रण गर्न पनि बेलायतका प्रधानमन्त्री जोनसनले सम्पुर्ण परिवारहरुलाई यसपटकको क्रिसमस फरक हुने बताउदैं घरमै सँगै बसेर मनाउन आग्रह समेत गरेका छन् ।
बिहीबारबाट पब, रेस्टुरेन्ट, जिम र अतिआवश्यक सूचीमा नरहेका पसलहरु चार हप्ताका लागि बन्द हुने उनले जनाएका छन् । तर, स्कूल, कलेज र विश्वविद्यालय भने सञ्चालन गर्न पाइनेछ । २ डिसेम्बरबाट प्रतिबन्धहरुलाई खुकुलो बनाउँदै लगिने पनि उनले जानकारी दिए ।
