काठमाडौं । नेकपाका अध्यक्ष एवं प्रधानमन्त्री केपी ओलीलाई सचिवालय बैठक बोलाउन अर्का अध्यक्ष पुपष्पकमल दाहाल, प्रचण्डले केही दिन अघि बैठक बोलाउन भन्दै निवेदन लेख्नुभयो । निवेदनको शीर्षक बैठक बोलाइ पाउँ भनेर लेखिएको छ भने अध्यक्ष ओलीलाई सम्बोधन गरिएको छ ।
त्यो पत्रमा प्रधानमन्त्रीले तोक लगाइदिनुभयो विष्णु पौडेललाई दिनुभयो । उहाँले पार्टी महासचिव विष्णु पौडेलका नाममा तोक लगाउँदै 'महासचिवजी पार्टीको विधान र आवश्यकताका आधारमा बैठक बोलाउनु' भनेर लेख्नुभयो ।
यो प्रसंग त सकिइ नै हाल्यो किनकी महासचिव पौडेलले आवश्यकता अनुसार दुवै अध्यक्षसँग परामर्श गर्नुभयो र बैठक बोलाउनुभयो । बैठक आज अपरान्ह बालुवाटारमा बस्ने भएको छ । जुन सूचना सार्वजनिक नै भइसकेको छ ।
तर प्रसंग भने यहाँ प्रधानमन्त्री एवं पार्टी अध्यक्ष ओलीले प्रचण्ड लगायतका पाँच जना नेतालाई लेखेको पत्रको हो । उहाँले त्यस पत्रमा के लेख्नुभएको छ भन्ने भन्दा पनि बैठक बोलाउनका लागि दिइएको निवेदनको जवाफमा प्रधानमन्त्रीले किन पत्र लेख्नुभयो भन्ने नै बढी रहस्यमय छ ।
खासमा बैठक बोलाउनका लागि पनि आवेदन हाल्नुपर्ने थिएन । तर अध्यक्ष ओलीले त्यसैको जवाफमा अर्का अध्यक्ष प्रचण्डलाई नै सम्बोधन नै गरेर पत्र पठाउनुभएको छ । उहाँले प्रचण्डलाई सम्बोधन गर्नुभएको छ र अरु चार नेता माधव नेपाल, झलनाथ खनाल, बामदेव गौतम र नाराणकाजी श्रेष्ठलाई बोधार्थ पठाउनुभएको छ । तर पत्रमा भने उहाँले आफू विरुद्ध तिनै पाँच जनाले घेराबन्दी गरेका उल्लेख गर्नुभएको छ ।
त्यस पत्रमा आफू विरुद्ध गुटबन्दी गर्ने, पार्टीका कुनै पनि बैठकमा आउनुअघि गुटगत धारणा बनाएर आउने र बैठकमा आफू विरुद्ध जाइलाग्ने काम यिनै पाँच जनाले गरेको र पार्टीलाई फुटको संघारमा धकेलेको काम पनि यीनै पाँच जनाले गरेको स्पष्ट संकेत दिनुभएको छ ।
पार्टीका कार्यालयमार्फत ती नेताहरुका हातहातमा सो पत्र किन पठाइयो ? ओली निकटक एक नेताले भने, 'पार्टी अध्यक्ष ओलीले यी पाँच जनालाई एकै ठाउँमा राखेर आफ्ना कुरा राख्न नपाएको धेरै भयो तर उनीहरुका हरेक दिनका गुटगत भेलाहरुका बारेमा जानकारी लिइरहनुभएको छ । त्यसैले उहाँले आफ्ना कुरा त्यही पत्रमार्फत् राख्न्ुनभएको हो ।'
