काठमाडौं । शहरी विकास राज्यमन्त्री रामवीर मानन्धरले शहरी क्षेत्रको सार्वजनिक यातायात सेवा व्यवस्थित पारिने बताउनुभएको छ । बालाजु तारकेश्वर यातायात प्रालिको विशेष साधारण सभामा बोल्दै मन्त्री मानन्धरले शहरलाई व्यवस्थित बनाउनका लागि सार्वजनिक यातायातको भुमिका महत्वपुर्ण हुने भएकाले व्यवस्थित रुपमा सञ्चालनका लागि सरकारले काम गरिरहेको बताउनुभयो । लकडाउनका कारण सार्वजनिक यातायात सञ्चालकहरु समस्यामा परेको गुनासो आइरहेको र सरकारले व्यावसायीको समस्या समाधानका लागि पहल गरिरहेको उहाँले जानकारी दिनुभयो ।
नेपालको यातायात सञ्चालन प्रणाली कमजोर रहेको बताउँदै मन्त्री मानन्धरले जनताले सहज रुपमा यात्रा गर्न पाउनेगरी सुधार गर्न पनि यातायात व्यावसायीलाई आग्रह गर्नुभयो ।
सरकार जनताको जीवन रक्षाका लागि हर तरहको प्रयास गरिरहेको बताउँदै मन्त्री मानन्धरले स्वास्थ्य सावधानीका मापदण्ड अनुसार सवारी सञ्चालन र यात्रा गर्न आग्रह समेत गर्नुभएको छ । मन्त्री मानन्धरले जनताको जीवन रक्षासँगै विकास निर्माणलाई पनि तिब्र रुपमा अघि बढाउनका लागि सरकारले विभिन्न विकल्पमा काम गरिरहेको बताउँदै अर्थतन्त्रलाई मितव्ययी र चलायमान बनाउन सरकारले कार्ययोजना ल्याइसकेको जानकारी पनि दिनुभयो। मन्त्री मानन्धरले तिहारपछि निर्माणका ठुला परियोजनाले थप गति लिने बताउँदै जनताको समृद्धिको सपना केपी ओली नेतृत्वको सरकारले पुरा गरेरै छाड्ने बताउनुभयो ।
कार्यक्रमममा तारकेश्वर यातायात प्रालिका सचिव परशुराम लामिछानेले लकडाउनका कारण समस्यामा परेका यातायात व्यावसायीको मर्का बुझेर निर्णय गरिदिन सरकारलाई आग्रह गर्नुभयो । प्रालिका अध्यक्ष मिनबहादुर मानन्धरले धराशायी बनेको सार्वजनिक यातायातको पुनरुत्थानका लागि विशेष प्याकेज आवश्यक रहेको बताउनुभयो ।
