काठमाडौँ । अदालतले आशिष देउला उर्फ ‘सुगर ड्याडी’लाई थुनामा राख्न आदेश दिएको छ ।
जिल्ला अदालत काठमाडौँका न्यायाधीश महेन्द्रबहादुर कार्कीले युवा–युवतीलाई रडले डामेर यातना दिने देउलालाई पुर्पक्षका लागी थुनामा राख्न आदेश गरेका हुन् ।
सरकारी वकिल कार्यालय काठमाडौँले उनीविरुद्ध अपहरण तथा शरीर बन्ध र ज्यान मार्ने उद्योग मुद्दा दर्ता गरेको थियो ।
३३ वर्षीय देउलासहित ४ जना भदौ १८ मा पक्राउ परेका थिए । देउलाको समूहले भदौ ७ मा विशाल पोडेलाई टेकुस्थित दोभान पुलबाट लगनटोलस्थित सलबालमा लगेर यातना दिएका थिए ।
पानी तताउने विद्युतीय रड तताउँदै विशालको शरीरमा पोलेर करिब ३ घण्टासम्म बन्धक बनाएर उनीसहितका ४ जना मिलेर डामेको प्रहरीको अनुसन्धानबाट खुलेको थियो ।
साथै, देउलासँगै उदयपुर घर भएका २२ वर्षीय ओजस्वी तामाङलाई पनि अपहरण तथा शरीर बन्धक र ज्यान मार्ने उद्योग कसुरमा अदालतले पुर्पक्षका लागि थुनामा पठाउन आदेश गरेको छ ।
