काठमाडौं । गत साउनमा मात्र राष्ट्रिय प्रजातन्त्र पार्टी परित्याग गरेर काँग्रेसमा प्रवेश गरेका सुनिल थापालाई नेपाली काँग्रेसले सहमहामन्त्री बनाएको छ। शुक्रबार बसेको केन्द्रीय समितिको बैठकले थापालाई सह–महामन्त्री बनाउने निर्णय गरेको अर्का सहमहामन्त्री डा.प्रकाशशरण महतले जानकारी दिए । थापा राप्रपाका संस्थापक नेता तथा पूर्व प्रधानमन्त्री सूर्यबहादुर थापाका छोरा हुन् ।
आजको बैठकमा थापा समूहको व्यवस्थापन बारे प्रस्ताव पेस भएको थियो । सोही अनुसार थापासँगै काँग्रेस प्रवेश गरेका अन्य ७ जना नेतालाई पनि काँग्रेसको केन्द्रीय सदस्य र २ जनालाई आमन्त्रित केन्द्रीय सदस्यमा मनोनित गरिएको छ ।
यसरी नियुक्त हुने केन्द्रीय सदस्यमा रामप्रसाद भट्टराई (मोरङ), विष्णुविक्रम थापा (सिन्धुपाल्चोक), बाबुराम बस्नेत (भोजपुर), वृजलाल यादव (बारा), किरण गिरी (काठमाडौं), टि.एन. योगी (ललितपुर), दिलीप राई (झापा) छन् भने कैलालीका आशाराम चौधरी र कपिलवस्तुका राजेशबहादुर सिंह आमन्त्रित केन्द्रीय सदस्य रहेका छन् ।
त्यसैगरी आजैको बैठकले सांसद सूर्यबहादुर केसीको निधनका कारण रिक्त समानूपातिक कोटाको सांसदमा स्यांजाका मोहन पाण्डेलाई पठाउने निर्णय गरेको छ ।
