काठमाडौं । त्रिवि इन्जिनियरिङ अध्ययन संस्थानको डीन छनोट समितिले पाँच जना प्राध्यापकको नाममा प्रथम चरणमा अन्तरवार्ताका लागि सार्वजनिक गरेको छ । छनोटमा परेकाहरुमा प्रा. डा. भोलानाथ शर्मा घिमिरे, प्रा.डा. लक्ष्मण पौडेल, प्रा.डा. संगीता सिंह, प्रा. डा. सुवर्ण शाक्य र प्रा. डा. सुशीलबहादुर बज्राचार्य छन् । उनीहरुको प्रस्तुति तथा अन्तरवार्ता भोलि शुक्रबार हुने छ ।
पाँच जनामध्ये शैक्षिक उपाधिमा संख्या गरिएका वा गतिलो शैक्षिक उपाधि हासिल गरेका प्राध्यापक भने सीमित छन् ।
वर्णानुक्रमअनुसार प्रकाशित सूचीमा भएकाहरुमा प्रा. डा. भोलानाथ शर्मा घिमिरेले एनटीएनयु नर्वेबाट मास्टर तह र विश्वविद्यालय आइआईटी बम्बेबाट विद्यावारिधि उपाधि हासिल गरेका हुन् भने अन्तर्राष्ट्रिय प्रतिष्ठित सूचीकृत जर्नलमा प्रथम लेखकका रुपमा शोधपत्र प्रकाशन गरी विद्यावारिधि गर्नेमा उनी मात्र रहेको पाइएको छ ।
त्यस्तै प्रा.डा लक्ष्मण पौडेलले स्नातकमा भारतबाट तीन वर्षे एएमआईई, काठमाडौं युनिभर्सिटीबाट विद्यावारिधि उपाधि लिएका हुन् । त्रिविले समकक्षता प्रदान गरे तापनि उनको उपाधि एएमआईईलाई शैक्षिक उपाधि नभएको भनी भारतको विश्वविद्यालय अनुदान आयोगले किटान गरेको हुँदा नेपालमा पनि बेलाबखतमा प्रश्न उठ्ने गरेको छ ।
त्यस्तै प्रा.डा. संगीता सिंहको पनि विद्यावारिधि गर्दा र हालसम्म पनि प्रथम लेखकका रुपमा कुनै पनि अन्तर्राष्ट्रिय प्रतिष्ठित सूचिकृत जर्नलमा प्रकाशन नरहेको हुनाले प्राज्ञिक विशिष्टतामा प्रह्न चिह्न छ । राष्ट्रिय योजना आयोगमा एमालेको कोटाबाट दुई पटकसम्म सदस्य भइसकेकी प्रा. डा. सिंह माननीय भइसकेको व्यक्ति इन्जिनियरिङ अध्ययन संस्थानको डीन पदमा सूचीकृत हुँदा माननीयको हैसियतलाई अनादर गरेको देखिन्छ ।
प्रा. डा. सूवर्ण शाक्यको हकमा भने थुप्रै विवादास्पद विषय रहेको देखिन्छ । डा. शाक्यले पहिलेको सोभियत संघबाट विद्यावारिधि गरेको भए पनि त्यसमा शंका गर्नुपर्ने रहेको थुप्रै ठाउँ रहेको जानकार बताउँछन् । विगत लामो समयदेखि त्रिविको एक मात्र कम्प्युटर इन्जिनियरिङका पूर्ण प्राध्यापक हालसम्मका विवादास्पद कार्यहरुले आफ्नै साथीभाईहरु निजप्रतिको हेराई राम्रो मान्दैनन् । विद्यावारिधिमा के कस्तो जर्नर प्रकाशन गरेको कसैलाई पनि थाहा नभएको तथा प्राध्यापक जस्तो विशिष्ट पदको पदीय आचरणको स्खलन हुने गरी विभिन्न निजी इन्जिनियरिङ कलेजहरुमा आफ्नो र परिवारको नाममा सेयर रहेको तथा प्रिडेटोरी जर्नलमा लेख प्रकाशन गर्ने गरेको बताइएको छ । केही समय पहिले फेक संस्थाबाट संसारकै टप १०० प्राध्यापक हो भनी प्रचार गरेको आरोप पनि उनीमाथि छ ।
त्यस्तै प्रा. सुशिलबहादुर बज्राचार्य इन्जिनियरिङ अध्ययन संस्थानमा कार्यरत सहायक डीन हुन् । प्रा. बज्राचार्यको विद्यावारिधि उपाधि गर्दा एउटा पनि लेख जर्नरमा प्रकाशन भएको देखिँदैछ । हालसम्म पनि प्रथम लेखकका रुपमा प्रा. बज्राचार्यको कुनै पनि गतिलो लेख प्रकाशन छैन ।
यसरी समग्रमा हेर्दा डीन पदको दावेदारीमा सूचीकृत भएका ८० प्रतिशत प्राध्यापकहरुको नैतिकता र प्राज्ञिक विशिष्टतामा प्रश्न उठ्ने देखिन्छ । अब पाँच जनाबाट छनोट समितिले तीन जनाको नाम डीन नियुक्तिका लागि सिफारिस गर्ने छ । अब छनोट समितिले के आधारमा तीन जनाको नाम सिफारिस गर्छ त्यो मूल्यांकन हुनै बाँकी छ र सबै सरोकारवालाको ध्यान त्यसैको प्रतिक्षामा छ ।
