बैतडी । बैतडीको झुलाघाट नाका पाँच दिनका लागि खोलिने भएको छ। भारतसँग सीमा जोडिएको झुलाघाट नाका मंसिर ८ गते देखि मंसिर १२ गते सम्मका लागि नाका खुला गरिने भएको हो।
बैतडीका सहायक प्रमुख जिल्ला अधिकारी लोकेन्द्रसिंह नेगीका अनुसार लामो समयदेखि पेन्सन बुझ्न नपाएका भारतीय पेन्सनधारी नेपाली नागरिकलाई पेन्सन बुझ्नका लागि सहज हुने भएकाले दुवै देशका स्थानीय प्रशासनको सहजीकरणमा नाका खोल्ने तयारी गरिएको हो ।
कोरोनाका कारण सीमा नाका बन्द भएपछि गएको चैतदेखि पेन्सनधारी नागरिकहरूले पेन्सन बुझ्न पाएका छैनन्। नाकामा पेन्सनधारी र अन्यहरूले आवतजावत गर्दा स्वास्थ्य सुरक्षा सतर्कताका सबै मापदण्ड परिपालना गर्नुपर्नेछ।
